Oralda turǵyndar aýylda júrip-turýdyń qıyndyǵyn aıtyp shaǵymdandy
ORAL. KAZINFORM — Oral qalasy Derkól kenttik ákimdigine qarasty Mashtakov aýylynyń turǵyndary birneshe máseleniń sheshilmeı otyrǵanyn aıtty.
Aýyl turǵyndarynyń málim etkenindeı, eń basty másele – joldar. Trassanyń jaǵdaıy qalypty bolǵanymen, aýyl ishindegi joldardyń jaı-kúıi syn kótermeıdi. Jańbyrdan keıin jol batpaqqa aınalady. Onymen avtokólikpen de, jaıaý da júrý múmkin emes. HHІ ǵasyrda aýyl turǵyndary osyndaı jaǵdaıǵa tap bolyp otyr.
- Kóshelerdi jaryqtandyrý da eleýli máselege aınaldy. Keıbir kóshelerde sham bar, birqatarynda múldem joq ne janbaıdy. Keshkisin adamdarǵa qarańǵyda júrýge týra keledi, bul qaýipti. Balalar alańyna erekshe toqtalǵymyz keledi. Jabdyqtary eskirgen, birqatary zaqymdanǵan. Biz artyq eshteńe surap otyrǵan joqpyz: qalypty jol, kósheni jaryqtandyrý jáne qaýipsiz balalar alańy. Bul ár eldi mekende bolýy tıis, - deıdi turǵyndar.
Osyǵan baılanysty Kazinform tilshisi Oral qalasy ákimdigine arnaıy saýal joldaǵan edi.
Qala ákimdiginen túsken málimetke qaraǵanda, qazirgi kezde avtomobıl joly qurylysyna qarastyrylǵan jer ýchaskesi rásimdelgen. Jobalyq-smetalyq qujattama jasalyp, tıisti qarjy bólingennen keıin jol qurylysy belgilengen tártippen júrgiziledi.
Mashtakov eldi mekeninde syrtqy jaryqtandyrý jelisi jumys isteıdi. Degenmen turǵyndar pikiri eskerilip, qajetti ýchaskelerde qosymsha shamdar ornatý múmkindigi oılastyrylady.
- Balalar oıyn alańyna qatysty aıtarymyz, Derkól kenti ákimdigi apparatynyń mamandary onyń tehnıkalyq jaı-kúıin komıssııalyq tekserýden ótkizdi. Alańnyń aqaýyn jóndeý jáne zaqymdalǵan oıyn jabdyqtaryn aýystyrý jóninde akt jasaldy. Tıisti bıýdjettik qarjy qaralǵannan keıin balalar oıyn alańyn jóndeý men qalpyna keltirý jumystary atqarylady, - delingen resmı jaýapta.
Mashtakov eldi mekeninde 1 490 turǵyn, 391 aýla bar, áleýmettik nysandardan 1 medpýnkt jumys isteıdi.
Eske sala keteıik, budan buryn Oralda barar jer, basar taýy joq turǵyndar apatty úıde turyp jatqanyn jazǵan edik.
