Oralda turǵyndar aǵashtardyń kesilip jatqanyn aıtyp shaǵymdandy
ORAL. KAZINFORM — Oral qalasynda N.Nazarbaev atyndaǵy dańǵyl boıynda aǵashtardyń kesilip jatqany jóninde áleýmettik jelide beınejazba jarııalandy.
Qala turǵynynyń Instagram áleýmettik jelisinde málim etkenindeı, «Baspahana» aıaldamasy tusynda buryn birneshe aǵash bolǵan.
— Mine, qarańyz, qandaı terekter kesilgen. Buǵan kim ruqsat berdi? Osy aıaldama mańynda áıteýir bir nárse jasalady da jatady. Endi tenderdi jeńip alǵan bireý óz plıtasyn tóseıtin bolar. Dańǵyldyń qarsy betinde tym-táýir asfalt bolǵan, ony da alyp tastaǵan. Jyl saıyn tek bir jerde taqtatas pen asfalt tóseıdi. Ásirese, ákimdikter aldynda. Qalanyń shetkeri aımaqtarynda ótken ǵasyrdan beri eshteńe istelmeıdi, — deıdi áıel.
Turǵyndardyń pikirinshe, mundaı ǵasyrlyq aǵashtar ári ottegin bóledi, ári adamdarǵa kóleńkesin túsirip turatyn edi. Shyrshalar ádemi bolǵanymen, onyń tasasyna tyǵyla almaısyń.
Osy máselege baılanysty Kazinform tilshisi joldaǵan arnaıy saýalǵa Oral qalasy ákimdigi jaýap berdi.
Ákimdikten alynǵan málimetke qaraǵanda, apattyq jaǵdaıdaǵy eki aǵash kesilgen.
— «Baspahana» aıaldamasy mańynda, N.Nazarbaev dańǵyly boıynda Saraıshyq kóshesinen J.Dosmuhamedov kóshesine deıingi trotýardy aǵymdaǵy jóndeý jumystary júrgizilip jatyr. Biryńǵaı sáýlettik kelbetti qalyptastyrý, sondaı-aq turǵyndardyń qaýipsizdigi men jaılylyǵyn arttyrý maqsatynda jaıaý júrginshiler aımaǵyn keńeıtý qarastyrylǵan. Abattandyrý jumystary aıasynda jańa aǵashtar, onyń ishinde kashtan men jóke aǵashtaryn otyrǵyzý josparlanyp otyr, — delingen resmı jaýapta.
Ákimdik málimeti boıynsha atalmysh jobanyń jalpy quny — 600 mln teńge. Ótken jyly bastalǵan jumysty bıyl bitirý kózdelip otyr.
Budan týra bir jyl buryn da atalǵan dańǵyl boıynda aǵashtardyń kesilýine baılanysty turǵyndar narazylyq bildirgen bolatyn.
Eske sala keteıik, budan buryn Oral qalasynda aǵashtyń nelikten kesilip jatqanyn jazǵan edik.
