Oralda turatyn 102 jastaǵy maıdangerge qos birdeı medal tabys etildi

ORAL. QazAqparat - QR Ulttyq ulanynyń bas qolbasshysy, general-leıtenant Rýslan Jaqsylyqovtyń tapsyrmasymen onyń tárbıe jáne áleýmettik-quqyqtyq jumystar jónindegi orynbasary, general-maıor Muhametqalı Satov Uly Otan soǵysy jáne Ulttyq ulan áskeriniń ardageri Semen Danılınniń úıine baryp, qos birdeı medaldy tapsyrdy, dep habarlaıdy «QazAqparat» HAA tilshisi.

Podpolkovnık Erbolat Sultanovtyń aıtýynsha, bıyl kúzde 103 jasqa tolatyn maıdangerge «Qazaqstan Respýblıkasynyń Ulttyq ulanyna 25 jyl» jáne «Armııa generaly S.Q.Nurmaǵambetov» medaldaryna qosa Ulttyq ulan qolbasshylyǵy shyǵarǵan «Biz Jeńistiń muragerlerimiz» atty kitap tabystaldy. Bul kitapta Semen Akımovıchtiń de ómiri men erlik joly baıandalǵan.
 

Kýrsk oblysynda 1914 jyly 30 qyrkúıekte dúnıege kelgen Semen Danılın áýeli Stalıngrad maıdanynda shyńdalyp, keıin Kýrsk ıinindegi qııan-keski shaıqastaǵa qatysady. 1942 jyly Brıansk áskerı-saıası ýchılışesiniń kýrsanttyǵynan 143-gvardııalyq mınomet polky batalon komandıriniń saıası bólim jónindegi orynbasarlyǵyna deıingi joldan ótken ol soǵystaǵy erligi úshin «Qyzyl Juldyz», ekinshi dárejeli Otan soǵysy ordenderimen, kóptegen medaldarmen marapattaldy. Jeńisti Germanııa jerinde qarsy alǵan Semen Danılın soǵystan keıin áýeli Almatyda, keıin Qaraǵandyda ishki áskerler polki komandıriniń saıası bólim jónindegi orynbasary retinde qyzmet etti. Qyzy Tatıana Oralda turǵannan keıin osynda qonys aýdarǵan Semen Akımovıch ózin áli de tyń sezinedi. Ol jas urpaqty otanshyldyq rýhta tárbıeleýge óz úlesin qosyp keledi.
 

«Biz ardagerlerimizdi eshqashan umytpaımyz. Olardyń ómir jolyn keıingi býynǵa úlgi etý maqsatynda kezdesýler uıymdastyrylady. Ár mereke saıyn úılerine arnaıy baryp, quttyqtaımyz. Áskerı bólim qyzmetkerleri de aıyna eki-úsh ret baryp, qal-jaǵdaılaryn bilip, kómektesip turady», dedi M.Satov.