Oralda tuńǵysh ret «Óner barysy» týrnıri ótti
ORAL. QazAqparat - Oral qalasynda tuńǵysh ret qazaq kúresinen "Óner barysy" týrnıri ótti, dep habarlaıdy QazAqparat tilshisi.
Qadyr Myrza Álı atyndaǵy mádenıet jáne óner ortalyǵynyń amfıteatrynda ótken dodaǵa óner salasynda júrgen barlyǵy 41 palýan qatysyp, baq synady.
BQO qazaq kúresi federatsııasy, Oral qalasy dene shynyqtyrý jáne sport bólimi, Qadyr Myrza Álı atyndaǵy mádenıet jáne óner ortalyǵy uıymdastyrǵan saıysta palýandar eki salmaq dárejesi boıynsha kilemge shyqty.
70 kelige deıingi salmaqta 18 ónerli jigit kúsh synasyp, Syrym aýdanynan kelgen Baýyrjan Bısqalıev jeńimpaz atandy.
Taǵy bir syrymdyq Bekbolat Haırýllın ekinshi orynǵa ıe boldy. Bókeıordalyq Ashat Qalen úshinshi júldege qosa "Úzdik tehnıkasy úshin" atalymyn ıelendi. Báıterektik Estemis Muqambetov "Jeńiske degen jigeri úshin", syrymdyq Meıirbek Qanatov "Jas palýan" atalymymen atap ótildi.
70 keliden joǵarylar arasynda 23 úmitkerdiń arasynda bórlilik Baqytjan Táýekeldiń mereıi ústem boldy. Aqjaıyqtyq Dáýlet Shámelov ekinshi, qaztalovtyq Jiger Maýsymov úshinshi orynǵa kóterildi.
Bul jarys ónerli jandardyń qazaq kúresine degen qyzyǵýshylyǵy men ynta-yqylasy mol ekendigin tanytyp, sonymen qatar jurtshylyqtyń da delebesin qozdyryp, bir serpiltip tastady. Olar aldaǵy ýaqytta da týrnırdiń dástúrli túrde ótip turýyna tilektestigin bildirdi.
