Oralda Tuńǵysh Prezıdent alańynyń jeri jalǵa berildi me — ákimdik jaýap berdi
ORAL. KAZINFORM — Oral qalasyndaǵy Tuńǵysh Prezıdent alańynyń jeri jalǵa berilgeni týraly áleýmettik jelide aqparat jaryq kórdi.
Qala turǵynynyń Instagram áleýmettik jelisinde málim etkenindeı, jalǵa berilgen oryndar balalar alańyna qaraı ornalasqan.
— Segiz batýt adam otyratyn jerdi jaýyp tastaǵan. Kisileri dóreki, poıyzdar balany taptap ketse, kim jaýap beredi? 15 velosıped bar, ótkende bir adamdy qaǵyp ketti. Surasam, qalalyq mádenıet jáne demalys saıabaǵynyń dırektory jalǵa berip, aqsha alyp otyr deıdi. Bala ómirine qaýipti zattar tur. Adam júretin durys jer joq, batýt jyrtyq. Ákimdik qaıda qarap otyr? — dep jazady turǵyn.
Osyǵan baılanysty Oral qalasy ákimdigi jaýap berdi.
Ákimdik málimetine qaraǵanda, Tuńǵysh Prezıdent alańy qazirgi tańda «Mádenıet jáne demalys saıabaqtary men skverleri dırektsııasy» MKK teńgerimine berilgen.
Alań aýmaǵynda zańsyz ornatylǵan attraktsıondar men oıyn-saýyq nysandaryn retke keltirý baǵytynda 1 aı boıy tıisti jumystar júrgizildi. Alaıda, eskertýlerge qaramastan, keıbir kásip ıeleri alańǵa qaıta shyǵyp, qyzmetin jalǵastyrdy. Osyǵan baılanysty alańda qaýipsizdik pen qoǵamdyq tártipti saqtaý maqsatynda naqty sheshimder qabyldandy.
— 31 arnaıy oryn belgilenip, qujattaryn tapsyryp, ótinish qaldyrǵan kásipkerlermen kelisim-sharttar jasaldy. Sol kásipkerler belgilengen ýchaskelerde óz qyzmetterin kórsete alady. Alań aýmaǵy túgel emes, naqty ruqsat berilgen bólikter ǵana paıdalanýǵa usynyldy. Otbasylyq poıyzdarǵa arnaıy qozǵalys joldary bólindi. Olar jaıaý júrginshilerge kedergi keltirmeıdi. Al elektrli samokattar, gıroskýter jáne taǵy osyndaı qatty jyldamdyqpen júretin kólik quraldarymen alańda júrýge tyıym salynǵan, — delingen resmı jaýapta.
«Mádenıet jáne demalys saıabaqtary men skverleri dırektsııasy» MKK dırektory Meıirbek Qajyǵalıev Tuńǵysh Prezıdent alańynyń 11 maýsymda mekemege teńgerimge berilgenin rastady.
Onyń aıtýynsha, sodan beri reıd jumystary júrgizildi. Kásipkerlerdiń zańsyz qyzmet kórsetýine jol bermeý úshin alań únemi baqylanady.
— Kúni búgin 28 kásipkermen kelisim-shart jasaldy. Jalǵa berýden túsken qarjyǵa alańnyń jaryǵyn qamtamasyz etý, órnektasty jóndeý sııaqty jumystar atqarylady. Alańnyń tazalyǵy men qaýipsizdigin saqtaý úshin 5-6 jumysshy, 8 kúzetshi jumysqa alyndy. Olar óz qyzmetterin atqarýda, — dedi M.Qajyǵalıev.
Eske sala keteıik, budan buryn Qazaqstanda attraktsıondardy tekseretin synaq ortalyqtary bar ma, sol týraly jazǵan edik.