Oralda túngi klýbqa kelýshilerge qol jumsaǵan 17 kúzet qyzmetkeri ustaldy

ORAL. KAZINFORM – Oralda túngi klýbtardyń birinde kúzet qyzmetkerleriniń zańsyz áreketteri anyqtalyp, joly kesildi.

BQO polıtsııa departamentiniń baspasóz qyzmetinen málim etkenindeı, kúzetshiler kelýshilerdiń qaýipsizdigin qamtamasyz etýdiń ornyna, kerisinshe qatygezdik tanytyp, kúsh qoldanǵan. 

Arnaıy operatsııa barysynda kúdikti top músheleri tek Oralda ǵana emes, sondaı-aq Almaty jáne Aqtaý qalalarynda da ustaldy. Barlyǵy — Batys Qazaqstan oblysynyń týmalary. Olardyń tórteýi buǵan deıin de qylmystyq jaýapkershilikke tartylǵan. Jalpy, ishki ister organdaryna 17 adam jetkizildi, sonyń ishinde 8 kúdikti ýaqytsha ustaý ızolıatoryna qamaldy. 
Jedel izdestirý is-sharalaryn Batys Qazaqstan oblysy polıtsııa departamentiniń uıymdasqan qylmysqa qarsy kúres basqarmasy arnaıy bólimshelerdiń qoldaýymen júrgizgen.

Tergeý barysynda anyqtalǵanyndaı, kúzetshiler kelýshilerge júıeli túrde jáne negizsiz kúsh qoldanǵan, sonyń saldarynan jábirlenýshilerge túrli dene jaraqattary, sonyń ishinde aýyr zııan keltirilgen. Kóp jaǵdaıda jábirlenýshiler quqyq qorǵaý organdaryna shaǵymdanýdan qorqyp, únsiz qalǵan. Oǵan sebep — kúdiktiler tarapynan qysym men qýdalaý qaýpi bolýy múmkin. 

— Qazirgi ýaqytta kúdiktilerge qatysty eki nemese odan da kóp adamǵa qasaqana aýyr dene jaraqatyn keltirý jáne toppen jasalǵan buzaqylyq boıynsha QR Qylmystyq kodeksiniń baptaryna sáıkes qylmystyq is qozǵaldy. Tintý kezinde 7 radıostantsııa (sonyń ishinde bireýi — polıtsııa qyzmetkerlerine arnalǵan baılanys quraly), pyshaqtar, buryshty gaz ballony, beısbol taıaǵy, jaqyn shetelderge tıesili bolýy múmkin 10-ǵa jýyq kóliktiń nómirlik belgisi tárkilendi, — dep habarlady vedomstvodan. 

Eske sala keteıik, budan buryn BQO-da júk kóligi poıyzben soqtyǵysyp, júrgizýshi mert bolǵanyn jazǵan edik.