Oralda túnde órt shyqqan kópqabatty úıden 83 adam evakýatsııalandy
ORAL. QazAqparat – Oralda túnde órt shyqqan kópqabatty úıden 83 adam evakýatsııalandy, dep habarlaıdy QazAqparat tilshisi.
Batys Qazaqstan oblysy Tótenshe jaǵdaı departamentiniń baspasóz qyzmeti málim etkenindeı, 18 mamyr kúni saǵat 23.38-de D.Qonaev atyndaǵy shaǵynaýdanda 67-úıdiń 3-qabatynda órt shyqqany jóninde 101 telefonyna habar tústi.
Oqıǵa ornyna jetken №1 mamandandyrylǵan órt sóndirý bólimi barlaý júrgizgen kezde toǵyz qabatty úıdiń atalǵan páterinde jeke zattar men dıvannyń jalyn sharpyǵanyn anyqtady. Sondyqtan №2 mamandandyrylǵan órt sóndirý bólimi men jedel qutqarý jasaǵy kómekke shaqyrtyldy.
Jeke quramnyń tez qımyldaýy nátıjesinde órt qysqa ýaqytta, 19 mamyrda saǵat 00.15-te oqshaýlanyp, 00.25-te sóndirildi.
Úıden 83 adam qaýipsiz jerge kóshirildi, sonyń 33-i – jasóspirim. Sonyń ishinde 9 bala jedel járdemge tapsyryldy.
Qazirgi kezde órttiń shyǵý sebebi, keltirilgen shyǵyn, kináli adamdar anyqtalyp jatyr.
Eske sala keteıik, budan buryn BQO-da órt qaýipsizdigi erejesin buzǵan 117 adamnyń jaýapqa tartylǵanyn jazǵan bolatynbyz.
