Oralda túnde kólikterdiń júrýine shekteý qoıyldy

ORAL. QazAqparat – Oral qalasy bas memlekettik sanıtar dárigeriniń 4 qarashadaǵy qaýlysyna sáıkes qosymsha shekteý sharasy engizildi, dep habarlaıdy QazAqparat tilshisi.

BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, qaýly 7 qarashadan bastap kúshine enedi.

Qaýlyǵa sáıkes jedel járdem, avarııalyq qyzmetter jáne basqa arnaıy organdardyń avtokóligin, sondaı-aq túngi aýysymda jumys jasaıtyn adamdardyń avtokólikpen júrýin, asa qajet jaǵdaıda (dárihanalardan dári-dármek pen medıtsınalyq buıymdardy satyp alý maqsatynda shyǵý, shuǵyl jaǵdaı boıynsha medıtsınalyq mekemege barý) jeke avtokólikpen júrip-turýdy qospaǵanda, saǵat 23.00-den bastap 06.00-ge deıin avtokóliktiń júrýine shekteý qoıylady.

Jeke jáne zańdy tulǵalar basqa da dáleldi sebeptermen saǵat 23.00-den 06.00-ge deıin avtokólikpen júrý qajet bolǵan jaǵdaıda https://www.STOPCOVID.KZ saıtynda tirkelýi qajet nemese 109 telefon nómirine ótinish habarlama qaldyrýy tıis.

Batys Qazaqstan oblysy aqparattandyrý, memlekettik kórsetiletin qyzmetter jáne arhıvter basqarmasyna https://www.STOPCOVID.KZ saıtynyń úzdiksiz jumys isteýin qamtamasyz etý tapsyryldy.

BQO polıtsııa departamenti qosymsha shekteýdi saqtaý maqsatynda patrýldeýdi uıymdastyryp, atalǵan talap buzylǵan jaǵdaıda materıal toltyryp, Oral qalasy taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberedi.

Eske sala keteıik, budan buryn BQO-da toı úshin jalǵa beriletin kottedjderdiń tekserilip jatqanyn jazǵan bolatynbyz.