Oralda túnde belgisiz bireý kólikti órtep jiberdi
ORAL. QazAqparat - Oralda tún ishinde avtokólik órtendi, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa «Astana» shaǵyn aýdany 5/1 mekenjaıyndaǵy úıdiń aýlasynda oryn aldy.
2010 jylǵy «Toıota Kamrı» avtokóliginiń órtengeni jóninde 6 jeltoqsan kúni saǵat 23.15-te habar túsken. Avtokóliktiń motor bóligi men ishinara salony jandy.
Oqıǵa ornyna 1 tehnıkamen 5 adam barǵan. Órt saǵat 23.48-de oqshaýlanyp, saǵat 23.57-de sóndirildi.
Órttiń shyǵý sebebi, kináli adam, keltirilgen shyǵyn anyqtalýda. Áleýmettik jelide osy oqıǵanyń vıdeosy tarady. Onda ústine aq kıim kıgen adamnyń avtokólikke ot qoıyp, qashyp ketkeni anyq kórinedi.
BQO polıtsııa departamentiniń baspasóz qyzmeti bolǵan oqıǵany rastady. Atalmysh derek boıynsha QR QK 202-baby 2-bóligine sáıkes sotqa deıingi tergeý amaldary bastalyp, qasaqana ot qoıǵan turǵyndy anyqtaý jáne ustaý jumystary júrgizilýde.
