Oralda tún ortasynda tóbeles bolyp, jas jigittiń denesi tabyldy
BQO polıtsııa departamentiniń baspasóz qyzmeti málim etkenindeı, 11 qyrkúıekke qaraǵan túngi saǵat 00.08 shamasynda N.Nazarbaev dańǵyly boıyndaǵy qalanyń ortasynda ornalasqan shirkeý mańynda tóbeles bolyp jatqany jóninde habar tústi.
Polıtsııa qyzmetkerleri dereý jetken kezde 25-30 jastaǵy belgisiz er adamnyń denesi tabyldy. Keıin marqumnyń 1992 jylǵy turǵyn ekendigi anyqtaldy.
Qazirgi kezde atalǵan asa aýyr qylmysqa qatysy bar adamdar anyqtalý ústinde.
Osy oqıǵa boıynsha QR QK 106-baby 3-bóligine sáıkes sotqa deıingi tergeý amaldary júrgizilýde.
«Eger atalǵan qylmystyń kýágeri bolsańyz, Abaı polıtsııa bólimine nemese 102 nómirine habarlasý suralady. Polıtsııa departamenti aqparattyń qupııalylyǵyna kepildik beredi», dep habarlady departamenttiń baspasóz qyzmeti.
Eske sala keteıik, budan buryn Batys Qazaqstanda avtokólik aýdarylyp, eki adamnyń kóz jumǵanyn, BQO turǵynynyń 2,5 kelige jýyq marıhýanamen ustalǵanyn jazǵan bolatynbyz.