Oralda trıatlonnan el chempıondary anyqtaldy
ORAL. QazAqparat – Oral qalasynda tuńǵysh ret trıatlonnan respýblıkalyq jarys ótti, dep habarlaıdy QazAqparat tilshisi.
Jarysqa Nur-Sultan, Almaty, Shymkent qalalary men Túrkistan, Qostanaı jáne Jambyl oblystarynan barlyǵy 22 kásibı atlet qatysty.
Trıatlonshylar Qazaqstan kýbogynyń úshinshi kezeńi aıasynda Elite sanaty boıynsha sýpersprınt qashyqtyǵynan (300 metr júzý, 8 km velojarys jáne 2 shaqyrymǵa júgirý) synǵa tústi. Al el chempıonatynda atletter U17, U19 jáne U23 sanattary boıynsha sýpersprınt, sondaı-aq sprıntten (750 metrge júzý, 20 km velojarys, 5 km júgirý) jarysty.
Kúnniń ystyq bolýyna baılanysty (Shaǵan ózenindegi temperatýra +20 gradýs), atletter jarys jolyna gıdrokostıýmsiz shyqty.
Qazaqstan chempıonatynda U17 sanatynda sprıntten 1 saǵat 03 mınýt 32 sekýnd nátıjemen almatylyq Aleksandr Ten jeńimpaz atansa, taǵy bir almatylyq Eldar Shekerbek (1 saǵat 06 mınýt) - ekinshi, qostanaılyq Artem Frank (1 saǵat 12 mınýt 47 sekýnd) úshinshi keldi.
U19 sanatynda sýper-sprıntten shymkenttik Álıhan Ábýseıit (25 mınýt 38 sekýnd) ozdy. Úzdik úshtikke sondaı-aq túrkistandyq Erasyl Amanjolov (26 mınýt), almatylyq Roman Sanarov (27 mınýt 04 sekýnd) ilikti.
U23 sanatynda sýpersprıntten elordalyq Daryn Qonysbaev (24 mınýt 07 sekýnd) - birinshi, jambyldyq Vıtalıı Dıdıaev (30 mınýt 18 sekýnd) ekinshi orynǵa ıe boldy.
El kýbogynyń úshinshi kezeńinde Elite sanaty boıynsha áıelder arasynda sýpersprıntten astanalyq Arına Shýlgına (28 mınýt), almatylyqtar ıÝlııa Ozerova (29 mınýt 24 sekýnd) men Áıgerim Nurǵalı (31 mınýt 11 sekýnd) sáıkesinshe alǵashqy úsh oryndy jeńip aldy.
Erler arasynda sýpersprıntten shymkenttik Semen Pıvovarov (23 mınýt 57 sekýnd) eshkimdi shaq keltirmese, taǵy bir shymkenttik Danııl Zýbtsov (24 mınýt 50 sekýnd) - ekinshi, almatylyq Ánýar Turybaev (24 mınýt 51 sekýnd) úshinshi orynǵa kóterildi.
Jeksenbi kúni jarys jolyna áýesqoı atletter shyǵady.
Qazaqstan trıatlon federatsııasynyń sporttyq dırektory Sergeı Maıerdiń sózine qaraǵanda, trıatlonnyń elimizde taralǵanyna kóp bola qoıǵan joq. Federatsııa 2016 jyly quryldy. Sodan beri qazaqstandyq atletter halyqaralyq jarystarda da olja salyp keledi. Osy jarys qorytyndysynda sportshylar reıtıngilik upaı jınap, el quramasy irikteledi.
