Oralda «tramadol koroli» ýaqytsha ustaý ızolıatoryna qamaldy

ORAL. QazAqparat – Oral qalasynda «tramadol koroli» atanyp ketken Nıkolaı Karpov ustaldy, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, Oral qalasynyń 1976 jylǵy turǵyny 2 qyrkúıekke qaraǵan túni qolǵa tústi.

Departamentten túsken málimetke qaraǵanda, ol QR QK 190-baby 3-bóligine (iri mólsherdegi alaıaqtyq) sáıkes kúdikke ilinip otyr.

Bul bap boıynsha aıypty dep tanylǵan adam múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan 6 jylǵa deıingi merzimge aıyra otyryp nemese onsyz, 3 jyldan 7 jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.

Kúdikti Oral qalasy polıtsııa basqarmasynyń ýaqytsha ustaý ızolıatoryna qamaldy.

Eske sala keteıik, budan buryn «tramadol koroline» «qamqorshylyq» jasaǵan BQO polıtseılerine úkim shyqqanyn jazǵan bolatynbyz. Sottalǵan polıtsııa qyzmetkerleriniń «tramadol koroli» atanyp ketken Nıkolaı Karpovtyń zańsyz saýdamen aınalysatynyn bile tura, oǵan qamqorshylyq kórsetkeni aıtylǵan edi.