Oralda toıdaǵy janjalǵa baılanysty qylmystyq is qozǵaldy
ORAL. KAZINFORM — Oral qalasynda toıdaǵy janjalǵa baılanysty áleýmettik jelide beınejazba tarady.
Beınejazbada «tentek káde» suraǵan er adamdy jańa qudalardyń biri uryp qulatqany anyq kórinedi.
Osyǵan baılanysty Kazinform tilshisi BQO polıtsııa departamentine arnaıy saýal joldaǵan edi.
Departament málimetine qaraǵanda, toı 22 tamyz kúni Oral qalasynda bolǵan.
— Beınejazbadaǵy azamattardyń jeke basy anyqtaldy. Atalǵan derek boıynsha qylmystyq is qozǵaldy. Tergeý barysy baqylaýǵa alyndy. Qazaqstan Respýblıkasy Qylmystyq is júrgizý kodeksiniń 201-babyna sáıkes ózge aqparat jarııa etýge jatpaıdy, — delingen resmı jaýapta.
Qazirgi kezde oqıǵanyń mán-jaıy anyqtalyp jatyr.
Eske sala keteıik, budan buryn Oralda eki avtokólik soqtyǵysyp, áıel adam kóz jumǵanyn jazǵan edik.
