Oralda toı kortejinde jol erejesin óreskel buzǵan jeti kóliktiń biri aıyp turaǵyna qoıyldy
ORAL. QazAqparat - Oralda 10 maýsym kúni toı kortejine qatysqan jeti birdeı kólik jol erejesin óreskel buzdy, dep habarlaıdy «QazAqparat» tilshisi.
BQO ishki ister departamentiniń baspasóz qyzmetinen túsken málimetke qaraǵanda, Chagano-Naberejnaıa kóshesinde ornatylǵan beınebaqylaý kamerasyna «Bul kúnderdiń dańqy óshpeıdi» eskertkishi mańynda jol erejesin óreskel buzǵan toı korteji anyq túsip qalǵan. Osyndaı oqıǵa Saltanat saraıy mańynda da oryn aldy. Beınejazbada jol erejesin óreskel buzǵan avtokólik aıqyn kórinedi.
«Jaz shyǵa jıi oryn alatyn mundaı derektiń birde-biri jazasyz qalmaıdy. Sonyń ishinde toı kortejinde joldyń qarsy betine shyǵyp ketip, «erekshe kózge túsken» avtokólik aıyp turaǵyna qoıyldy. Endi sol júrgizýshi bir jylǵa kólik quralyn basqarý quqyǵynan aıyrylatyn bolady, qazirgi kezde sotqa materıal ázirlenýde. Jalpy, toıdyń juma, senbi kúnderi bolatyny belgili. Osyǵan baılanysty toı kortejderi ótetin jerlerge ornatylǵan beınekameralar arqyly olardyń jol erejesin buzbaýy aıryqsha baqylaýǵa alyndy», dedi «QazAqparat» tilshisine BQO ІІD jergilikti polıtsııa qyzmetiniń basshysy, polıtsııa polkovnıgi Manarbek Ǵabdýllın.
