Oralda toı kortejinde «oq atqan» jigit ustaldy
ORAL. QazAqparat – Oralda toı kortejinde «oq atqan» jigit ustaldy, dep habarlaıdy QazAqparat tilshisi.
Áleýmettik jelide taralǵan vıdeodan kóringenindeı, toı kortejinde júrgen jas jigit kóshe qıylysynda avtokóliginen shyǵyp, aýaǵa eki márte ot atqan.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 20 qarasha kúni Saltanat saraıy mańynda oryn alǵan. 102 telefonyna «VAZ-2115» avtokóliginen shyqqan belgisiz bireýdiń aýaǵa oq atqany jóninde qońyraý shalynǵan.
Sh. esimdi 20 jasar júrgizýshi sol boıda ustalyp, kólikten tapanshaǵa uqsas zat alyndy. Saraptama qorytyndysyna sáıkes Túrkııadan shyǵarylǵan «RETAY-Baron» tapanshasy atys qarýy bolyp tabylmaıdy.
Degenmen atalǵan azamatqa qatysty QR Ákimshilik quqyqbuzýshylyq kodeksi 434-baby 1-bóligine sáıkes (usaq buzaqylyq) ákimshilik is qozǵaldy.
Sonymen qatar júrgizýshiniń qujatyn teksergen kezde onyń jol-kólik oqıǵasy bolǵan jerden ketip qalǵany úshin mamandandyrylǵan ákimshilik sotynyń bıylǵy 23 qyrkúıektegi qaýlysymen 1 jylǵa kólik quralyn basqarý quqyǵynan aıyrylǵany anyqtaldy.
Avtokólik arnaıy turaqqa qoıyldy.
Júrgizýshige qatysty QR Ákimshilik quqyqbuzýshylyq kodeksi 612-baby 3-bóligine sáıkes (qujattary joq jáne basqarý quqyǵy joq adamnyń kólik quralyn basqarýy) ákimshilik is qozǵaldy.
