Oralda tótenshe jaǵdaı jarııalandy
ORAL. KAZINFORM — Oral qalasynyń aýmaǵynda jergilikti aýqymdaǵy tabıǵı sıpattaǵy tótenshe jaǵdaı jarııalandy.
Budan buryn habarlanǵanyndaı, aýa temperatýrasynyń qalyptan tys joǵary bolýyna baılanysty Zachagan kentinen shamamen 15 shaqyrym jerde ornalasqan qatty turmystyq qaldyqtar polıgonynyń aýmaǵynda órt shyqqan edi.
Órttiń jalpy aýmaǵy — 12 gektar. Oral qalasy ákimdiginen málim etkenindeı, órt týraly habar túsken sátten bastap «tilsiz jaýdy» oqshaýlaý jáne sóndirý jumystary dereý uıymdastyryldy. Órt oshaqtaryna úzdiksiz sý berilip, sóndirilgen aýmaqtar topyraqpen jabylypp jatyr.
Órtti tolyq sóndirý úshin qazirgi ýaqytta oqıǵa ornynda 34 arnaıy tehnıka jumyldyryldy.
Qalyptasqan jaǵdaıǵa baılanysty Oral qalasynyń aýmaǵynda jergilikti aýqymdaǵy tabıǵı sıpattaǵy tótenshe jaǵdaı jarııalandy.
Tótenshe jaǵdaıdy joıý jónindegi is-sharalardy basqarý Oral qalasy ákiminiń orynbasary Jandos Dúısenǵalıevke júkteldi.
— Jaǵdaı turaqty baqylaýda. Órtti tolyq sóndirý jáne tútinniń taralýyn barynsha azaıtý úshin barlyq qajetti sharalar qabyldanyp jatyr, — dep habarlady Oral qalasynyń ákimdiginen.
Eske salaıyq, budan buryn Oralda qatty turmystyq qaldyqtar polıgony órtengenin jazǵan edik.
