Oralda tótenshe jaǵdaı talabyn buzǵan turǵyndar ustaldy
BQO polıtsııa departamentiniń baspasóz qyzmeti málim etkenindeı, oqıǵa 9 qańtar kúni shamamen saǵat 23.15-te Zachagan kenti Jáńgir han kóshesinde boldy.
«Moskvıchı» janar-jaǵar maı quıý stansasy janynda reseılik tirkeýdegi «Granta» avtokóligi toqtatyldy.
Onda otyrǵan 1998, 1999 jylǵy tórt jas jigit Qyzylorda qalasynan kelgendigin túsindirdi. Olar Terekti aýdany Podstepnyı aýylyndaǵy blokposty kesip óte almaǵandyqtan, qalaǵa saıajaı alqaby arqyly kirgen. Jastardyń tártibi kúdikti boldy ári mashınadan alkogoldyń ısi shyǵyp turdy.
Medıtsınalyq tekserý júrgizýshiniń marıhýanany qoldanǵanyn rastady. Sonymen qatar avtokólikten 2 asúı pyshaǵy, ózine tán ısi bar jasyl tústi untaq salynǵan qorap, 4 uıaly telefon tabyldy.
Alynǵan zattar saraptamaǵa jiberiledi. Avtokólik arnaıy turaqqa qoıyldy.
Júrgizýshige qatysty QR Ákimshilik quqyqbuzýshylyq kodeksi 608-baby 1-bóligine sáıkes hattama toltyryldy. Oǵan qosa júrgizýshi men jolaýshylar tótenshe jaǵdaı talabyn buzǵany úshin 476-bapqa sáıkes jaýapkershilikke tartylady.
Taǵy bir oqıǵa 10 qańtar kúni saǵat 00.03 shamasynda K.Meńdálıev kóshesinde boldy. Polıtsııa qyzmetkerleri 1993 jylǵy eki turǵyndy ustady. Ózderimen birge jeke kýáliktei bolmaǵan olardan 5,45 kalıbrli áskerı oq-dári jáne pyshaq tárkilendi. Ustalǵan turǵynnyń sózine qaraǵanda, oq-dárini kósheden taýyp alǵan. Medıtsınalyq saraptama qorytyndysyna sáıkes tramadoldy qoldaný saldarynan ol esirtkige eltigen kúıinde bolǵan.
Qazirgi kezde QR QK 287-baby 3-bóligine (oq-dárilerdi zańsyz saqtaý) sáıkes sotqa deıingi tergeý amaldary júrgizilýde. Tıisti saraptamalar taǵaıyndaldy.
Ekinshi turǵynǵa qatysty tótenshe jaǵdaı talabyn buzǵany úshin ákimshilik hattama toltyryldy.
Eske sala keteıik, budan buryn Batys Qazaqstanda 10 adamnyń ákimshilik qamaýǵa alynǵanyn jazǵan bolatynbyz.
