Oralda tótenshe jaǵdaı kezinde Ulttyq ulannyń 150-ge jýyq sarbazy qyzmet atqarýda
ORAL. QazAqparat – Oralda tótenshe jaǵdaı kezinde Ulttyq ulannyń 150-ge jýyq sarbazy kúsheıtilgen rejımde qyzmet atqarýda, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵy baspasóz qyzmetiniń bastyǵy, podpolkovnık Erbolat Sultanovtyń aıtýynsha, 5517-áskerı bóliminiń jaýyngerleri polıtsııa qyzmetkerlerimen birge qala kóshelerinde qoǵamdyq tártiptiń saqtalýyn qamtamasyz etedi.
Sarbazdar qylmystyń aldyn alýmen qatar turǵyndarǵa karantındik shekteý sharalaryn, ózderiniń qaýipsizdigi úshin úıde otyrý qajettigin túsindiredi.
Tótenshe jaǵdaı kezinde Ulttyq ulan jaýyngerleriniń tikeleı qatysýymen úsh birdeı qylmystyq quqyqbuzýshylyq (sýyq qarýmen júrgender, uıaly telefon urlyǵy) ashyldy. Sondaı-aq qoǵamdyq oryndarda ishimdik ishý, buzaqylyq, tóbeles sekildi 13 ákimshilik quqyqbuzýshylyq tirkeldi.
«Áskerı qyzmetkerlerdiń jeke qaýipsizdikterine de aıryqsha mán beriledi. Olar jeke qorǵaný qural-jabdyqtarymen qamtylǵan. Atalmysh áskerı bólimde sanıtarlyq-epıdemıologııalyq sharalar turaqty júrgizilýde. Medıtsına qyzmetkerleri ár sarbazdyń densaýlyǵyn tekserip otyrady», - dedi E.Sultanov.
