Oralda tórt ózbekstandyq azamat koronavırýstan jazylyp shyqty
ORAL. QazAqparat – Oralda tórt ózbekstandyq azamat koronavırýstan jazylyp shyqty, dep habarlaıdy QazAqparat tilshisi.
Oblystyq juqpaly aýrýlar aýrýhanasynyń dırektory Nadııa Ahmetovanyń aıtýynsha, olardan alynǵan baqylaý synamasy taza ekendigin kórsetti.
Tórteýiniń de jaǵdaıy qanaǵattanarlyq.
«Endi bulardyń ekeýi óz júk kóligimen eline qaıtatyn bolady. Ekeýine taksımen jetý úshin qala ákimdigi arqyly ruqsat alynyp berildi. Qalǵan 97 naýqastyń bireýi aýyr halde. 32-si orta aýyr dárejede, qalǵanyniki jeńil ótip jatyr», dedi QazAqparat tilshisine N.Ahmetova.
Osylaısha Batys Qazaqstanda jazylyp shyqqandar sany alty adamǵa jetti.
Eske sala keteıik, budan buryn BQO-da koronavırýs juqtyrǵan 4 adamnyń júk tasymalymen aınalysatyn Ózbekstan azamaty bolyp shyqqanyn, búgin 1400-ge jýyq adamnyń úıde oqshaýlanǵanyn jazǵan bolatynbyz.
