Oralda tórt qabatty jańa turǵyn úı boı kóterdi

ORAL. QazAqparat – Oral qalasynda Respýblıka kúnine oraı 52 páterli tórt qabatty turǵyn úı paıdalanýǵa berildi, dep habarlaıdy QazAqparat tilshisi.

Turǵyndardy ulttyq merekemen quttyqtap, jańa páter kiltterin tapsyrǵan Oral qalasynyń ákimi Mırjan Satqanovtyń atap ótkenindeı, shaharda apatty jáne tozyǵy jetken úılerdiń ornyna ótken jyly qabyldanǵan renovatsııa baǵdarlamasy aıasynda jańa turǵyn úıler salynýda.

Onyń sózine qaraǵanda, qazirgi ýaqytta 145 páterdi quraıtyn 28 apatty úı buzylyp, solardyń ornyna 12 jańa úı boı kóterýde.

«S.Esqalıev kóshesi 149-mekenjaıynda salynǵanyna bir ǵasyr bolǵan eski, jartylaı qıraǵan úıdiń ornynda qazirgi zamanǵy ǵımarat salynyp bitti. Mundaǵy 52 páterli úıdiń 12-si baspanalary apatty dep tanylǵan otbasylarǵa berilip otyr», dedi M.Satqanov.

Jańa páter ıeleri Qanat Aldońǵalıuly, Elena Gýbenkova memleket tarapynan jasalyp otyrǵan qamqorlyqqa rıza ekendikterin aıtyp, qurylysty salǵan «Damý Jol Oral» JShS-ǵa rızashylyqtaryn bildirdi.

Qala ákimdiginen túsken málimetke qaraǵanda, 2021-2025 jyldarǵa arnalǵan renovatsııa baǵdarlamasyna sáıkes ınvestor kompanııalarmen 22 memorandým jasalǵan. Kúni búgin Oralda tozyǵy jetken úıler qory 30 paıyzdy quraıdy. Atap aıtqanda, 52 apatty jáne tozyǵy jetken 353-ten astam úı bar. Mine, solardyń ornyna jańa úıler salý jumysy jalǵasatyn bolady.