Oralda tórt balanyń anasyn qaǵyp óltirgen polıtseı bes jylǵa sottaldy
ORAL. QazAqparat – Oralda tórt balanyń anasyn qaǵyp óltirgen burynǵy polıtsııa qyzmetkeri Medet Rahadılovke qatysty sot úkimi shyqty, dep habarlaıdy QazAqparat tilshisi.
Oral qalalyq sotynan túsken málimetke qaraǵanda, M. Rahadılov QR QK 345-baby 3-bóligine sáıkes aıypty dep tanylyp, bes jylǵa bas bostandyǵynan aıyrý jazasyn qaýipsizdigi tómen qylmystyq-atqarý júıesi mekemesinde óteýge sottaldy.
Ol sonymen qatar bes jylǵa kólik júrgizý quqyǵynan aıyryldy.
Sot talqysynda belgili bolǵanyndaı, oqıǵa ótken jyly 7 jeltoqsan kúni boldy.
M. Rahadılov shamamen saǵat 03.00-de mas kúıinde «Audi B4» kóligimen Jáńgir han kóshesimen kele jatyp, jol erejesin óreskel buzǵan. Sonyń saldarynan 1990 jylǵy kelinshekti qaqqan.
Oblystyq kópbeıindi aýrýhanaǵa jetkizilgen jábirlenýshi keıin kóz jumdy. Marqumnyń tórt birdeı balasy jetim qaldy.
Sotta M. Rahadılov kinásin tolyqtaı moıyndady.
Jol-kólik oqıǵasy 2019 jyly jeltoqsan aıynda oryn alǵandyqtan, úkim Qylmystyq kodekstiń eski redaktsııasy talaptaryna sáıkes shyǵaryldy.
Jábirlenýshi tarap sottalýshyǵa keshirim bergen joq.
Sonymen qatar osyndaı qylmystarǵa jol bermeý jáne polıtsııa qyzmetkerleri arasynda aldyn alý sharalaryn júrgizý maqsatynda BQO polıtsııa departamenti atyna jeke qaýly shyǵaryldy.
Sot úkimi zańdy kúshine engen joq.
Eske sala keteıik, budan buryn Oralda polıtseı kólikti qaǵyp, jas kelinshektiń kóz jumǵanyn jazǵan bolatynbyz.
