Oralda tórt adamǵa qurmetti azamat ataǵy berildi
ORAL. QazAqparat - Búgin Oral qalalyq máslıhatynyń kezekten tys 19-sessııasynda óńirge eńbegi sińgen tórt adamǵa qurmetti azamat ataǵy berildi, dep habarlaıdy «QazAqparat» tilshisi.
Oral qalasy ákiminiń usynysy negizinde qalalyq máslıhat soǵys jáne eńbek ardageri Lıdııa Gýbanova men Alevtına Mıtrohına, sondaı-aq Qataýolla Ashyǵalıev pen Baýyrjan Tumanovqa «Oral qalasynyń qurmetti azamaty» ataǵyn berý týraly sheshim qabyldady.
Uly Otan soǵysyna qatysqan Lıdııa Gýbanova uzaq jyl mádenıet salasynda eńbek etti. Sonyń ishinde N.Krýpskaıa (qazirgi J.Moldaǵalıev) atyndaǵy oblystyq kitaphanaǵa jetekshilik etip, Qazaqstannyń eńbek sińirgen mádenıet qyzmetkeri atandy.
Maıdanger Alevtına Mıtrohına soǵystan keıin Oral qalasynda qalyp, jergilikti medıtsına ýchılışesinde dáris berdi. Keńes Odaǵynyń Batyry M.Mámetova memorıaldyq mýzeı-úıi janyndaǵy «Frontovıchka» klýbynyń tóraıymy.
Jetpis jastyń bıigine kóterilip otyrǵan oblystyq máslıhattyń depýtaty Qataýolla Ashyǵalıevti jurtshylyq sharýashylyq basshysy retinde jaqsy biledi. Kezinde Oral qalasynyń basshysy bolyp ta qyzmet etken ol 1995 jyly «Aqas» sharýa qojalyǵyn uıymdastyryp, keıin muny iri agroholdıngke aınaldyrdy.
Eńbek ardageri Baýyrjan Tumanov óńirde basshylyq qyzmetter atqardy. Sonyń ishinde Syrym aýdanyna jetekshilik etip, keıin BQO ákiminiń áleýmettik máseleler jónindegi orynbasary boldy.
Aıta keteıik, Oraldaǵy jańa alańǵa Tuńǵysh Prezıdent, 5-shaǵynaýdanǵa Qadyr Myrza Álı, jóndeý zaýyty aýdanyndaǵy shaǵyn baqqa Chernobyl AES apatynyń saldaryn joıýshylar ataǵyn, sondaı-aq «Juldyz» shaǵynaýdanyndaǵy 17, Derkól aýylyndaǵy 74 kóshege jańa ataýlar berý jóninde sheshim qabyldanyp, ol QR Úkimeti janyndaǵy respýblıkalyq onomastıka komıssııasyna joldanatyn boldy.
Sonymen qatar qaraýyndaǵy úsh birdeı qyzmetkerdiń para alyp, sottalýyna baılanysty Oral qalalyq ishki ister basqarmasy Abaı polıtsııa bólimi jergilikti polıtsııa qyzmetiniń bastyǵy Darhan Sátenovti qyzmetinen bosatýǵa kelisim berildi.
