Oralda topyraq ústine asfalt salynyp jatyr – ákimdik jaýap berdi

ORAL. KAZINFORM – Oral qalasynda topyraq ústine asfalt jol salynyp jatyrǵany jóninde beınejazba tarady.

Beınejazbada turǵyn Zachagan kentindegi Baıansulý kóshesinde ne qıyrshyq tas (şeben) joq, ne bıtým joq, topyraqtyń ústine asfalt quıylyp jatyrǵany jóninde habarlaǵan.

Zachagan kentiniń ákimi Aqqalı Áýbekerovtiń Kazinform tilshisine málim etkenindeı, qazirgi kezde aýylishilik joldar jańa tehnologııa boıynsha salynýda.

Onyń sózine qaraǵanda, joldyń astyna qıyrshyq tas tóselmeıdi.

«Eger qıyrshyq tas salynsa, bir jerden jarylsa, sý ótip ketip, topyraq opyrylady. Munda basqasha, topyraqtyń ústine qum-qıyrshyq tas qospasyna qosa tsement tógiledi, sonda qabaty óte qatty bolady. Muny ANT tehnologııasy deıdi. Budan úsh jyl buryn Qus fabrıkasy shaǵynaýdanynda jol osylaı tóseldi. Qazir avtobýs júredi, shaǵym joq, eger beti jarylsa, jóndeledi. Bıyl Avtomobılıst shaǵynaýdanynda da asfalt osyndaı tehnologııa boıynsha tóseldi», dedi A.Áýbekerov.

«Jol aktıvteri sapasynyń ulttyq ortalyǵy» RMK Batys Qazaqstan fılıalynyń bólim basshysy Dáýren Ámirov Baıansulý kóshesindegi joldyń topyraqty turaqtandyrý arqyly ANT tehnologııasy boıynsha salynyp jatqanyn jetkizdi.

«Mundaǵy joldyń negizi – ANT, ıaǵnı topyraq, qum-qıyrshyq tas qospasy, tsementti hımııalyq turaqtandyrý qosyp, qalyńdyǵy 25 santımetr qabattyń ústinen asfalt tóseıdi. Burynǵy jobalardaǵydaı qıyrshyq tas jeke-jeke salynbaıdy. Munda bir ǵana qabat, materıaldy únemdeý jaǵynan da tıimdi. Qazirgi kezde osyndaı jobalar kóp qoldanylýda», dedi D.Ámirov.

Eske sala keteıik, budan buryn BQO-da 114 mlrd teńgege 579 shaqyrym jol salynatynyn jazǵan bolatynbyz.