Oralda top bolyp tóbeleskender ustaldy

ORAL. KAZINFORM – Oral qalasynda túngi klýbtardyń birinde jas jigit eki adamdy pyshaqtady.BQO polıtsııa departamenti bastyǵynyń birinshi orynbasary, polıtsııa polkovnıgi Bolatbek Aqshaýovtyń málim etkenindeı, 3 qarasha kúni tańǵy saǵat 00.05 shamasynda túngi klýbqa jas jigit kirmekshi bolǵan.

Alaıda kúzetshiler onyń mas kúıde ekenin kórip jáne ózin dóreki ustaǵandyqtan, klýbqa kirgizbegen. Sodan keıin atalǵan jigit klýbqa kelgen bir azamat pen kúzet qyzmetkerine pyshaq jaraqatyn keltirgen. 
«Bir top kelýshiler men kúzetshiler jigitti janar-jaǵar maı stansasy mańynda ustap, polıtsııa qyzmetkerleri jetkenge deıin soqqyǵa jyqqan. Jigitke qatysty densaýlyqqa qasaqana aýyr zııan keltirý jáne buzaqylyq derekteri boıynsha sotqa deıingi tergeý bastaldy, ol ýaqytsha ustaý ızolıatoryna qamaýǵa alyndy. Sondaı-aq buzaqylyq deregi boıynsha mekeme kúzetshilerine qatysty sotqa deıingi tergeý bastaldy. Olardyń biri ýaqytsha ustaý ızolıatoryna qamaldy. Qazirgi ýaqytta polıtsııa oqıǵanyń barlyq qatysýshylaryn anyqtap, qolǵa túsirdi. Tergeý amaldary júrgizilýde», dedi B.Aqshaýov.
Áleýmettik jelide taralǵan beınejazbada VenOil janar-jaǵar maı quıý stansasy aýmaǵynda bir top adamnyń bireýdi dýbınkamen uryp jatqany anyq kórinedi. Tapanshadan oq atylǵany da estiledi.
Eske sala keteıik, budan buryn Oralda jol apatynan 63 jastaǵy áıeldiń kóz jumǵanyn jazǵan edik.