Oralda tok soǵyp, eki qolynan aıyrylǵan balanyń ata-anasyna páter berildi

ORAL. QazAqparat – Oral qalasyndaǵy Zachagan kentinde 180 páterlik 9 qabatty turǵyn úı paıdalanýǵa berildi, dep habarlaıdy QazAqparat tilshisi.

Atalmysh turǵyn úıdi «Aqjaiyq» ÁKK» AQ tapsyrysyna sáıkes «Altım» JShS qurylys kompanııasy salyp bitirdi.

Jalpy aýdany 10 583,5 sharshy metr bolatyn úıdiń 72 páteri bir, 72-si eki jáne 36-sy úsh bólmelik.

Páterler turǵyn úı kezeginde turǵan «Otbasy bank» salymshylaryna berildi.

Jańa páter ıelerin Oral qalasy ákiminiń orynbasary Ashat Kólbaev quttyqtap, kiltterin tabys etti.

BQO ákimdiginen málim etkenindeı, «Jaıyqmunaı» kompanııasynyń qoldaýymen osy jańa úıden oblys ákimi Ǵalı Esqalıevtiń atynan Jańaqala aýdanynda tok soǵyp, eki qolynan aıyrylǵan Amanjol Orynbekulynyń ata-anasyna úsh bólmeli páter berildi.

Balanyń anasy Ásel Serikqyzy tańdaǵan páter áleýmettik nysandarǵa (mektep, aýrýhana) jaqyn ornalasqan. Sonymen qatar Jańaqala aýdany ákimdigi atynan demeýshiler atynan Amanjoldyń bólmesine jıhaz tartý etildi.

Oǵan qosa jýyrda Almaty qalasynda Amanjoldyń qolyna ýaqytsha protez ornatyldy. Bala jasandy qolǵa úırengennen keıin bir jyldan soń bıonıkalyq protez qoıylady.

Eske sala keteıik, budan buryn tok soqqan eki balanyń aýrýhanaǵa túskenin, BQO ákiminiń tok soqqan balaǵa tıisi kómek kórsetiletini týraly aıtqanyn jazǵan bolatynbyz.

Sondaı-aq BQO-da tok soǵyp, eki qolynan aıyrylǵan bala oqıǵasy boıynsha qylmystyq is qozǵaldy.