Oralda toǵyzqumalaqtan Qazaqstan chempıonaty márege jetti
ORAL. QazAqparat - Oral qalasynda erler arasynda Qazaqstannyń toǵyzqumalaqtan komandalyq chempıonaty márege jetti, dep habarlaıdy QazAqparat tilshisi.
Bes kúnge sozylǵan jarysqa elimizdiń segiz oblysynan komandalar quramynda elýden astam sportshy qatysyp, baq synady. Olardyń arasynda talaı dodada oza shaýyp, báıge alǵan 1 QR eńbek sińirgen sport sheberi, 5 halyqaralyq dárejedegi sport sheberi, 11 sport sheberi boldy.
Aqyl-oı dodasynyń qorytyndysynda jalpykomandalyq esepte Pavlodar oblysynyń toǵyzqumalaq sheberleri birinshi oryndy jeńip aldy. Qyzylordalyqtar ekinshi, ońtústikqazaqstandyqtar úshinshi orynǵa kóterildi.
Jarystyń jabylý rásiminde toǵyzqumalaqtan QR bas jattyqtyrýshysy Aınur Jaqapbaeva men BQO toǵyzqumalaq federatsııasynyń atqarýshy dırektory, BQO quramasynyń aǵa jattyqtyrýshysy Dáýlet Ábdikárimov jeńimpaz-júldegerlerge dıplom, kýboktar tabys etti.
Jarystyń bas tóreshisi D.Ábdikárimovtiń aıtýynsha, «Rýhanı jańǵyrý» baǵdarlamasy aıasynda ulttyq sport túrin qoldaý maqsatynda uıymdastyrylǵan jarysta básekelestik joǵary boldy. Bir atap ótetin jaıt, chempıon atanǵan toǵyzqumalaqshylar sport sheberi ataǵyna ıe bolady.
