Oralda toǵyz qabatty jańa úı paıdalanýǵa berildi

ORAL. QazAqparat – Oralda Táýelsizdik kúnine oraı toǵyz qabatty, 180 páterlik turǵyn úı paıdalanýǵa berildi, dep habarlaıdy QazAqparat tilshisi.

Jańa úıdiń ashylý rásimine qatysqan oblys ákimi Ǵalı Esqalıevtiń atap ótkenindeı, Elbasy tapsyrmasyna sáıkes qabyldanǵan «Nurly jer» memlekettik baǵdarlamasy óz jemisin berip keledi.

Atalmysh baǵdarlama maqsaty – turǵyndardy qoljetimdi baspanamen qamtamasyz etý.

«Budan bes-alty jyl buryn bul jer bos jatqan bolatyn. Mine, osy mańda kópqabatty turǵyn úıler boı kóterýde. «Nurly jer» baǵdarlamasynyń tıimdiligi sol, turǵyn úı qurylys jınaq bankisine qarjy salyp, páter alǵandar bes paıyzdyq jyldyq mólsherlememen 15, 20, 25 jylǵa nesıe alady. Osy ýaqyt ishinde nesıeni jaýyp, páterdi óz menshiginde qaldyrady. Mysaly, 2 bólmeli páter úshin ıeleri aıyna 60 myń teńge tóleıdi. Mundaı qarjyǵa adamdar naryqtyq baǵamen eki bólmeli páter jaldap tura almaıdy. Ekinshiden, turǵyndar úshin ár sharshy metr quny 140 myń teńgeden keledi. Memleket úshin bul 215 myń teńgege túsedi. Merdiger mekemege, ınjenerlik ınfraqurylym tartýǵa, aýmaqty abattandyrýǵa qarjy memleket esebinen jumsalady. Bul – turǵyndar úshin edáýir jeńildik», dedi óńir basshysy.

Ǵ.Esqalıev turǵyn úıdi salyp bitirgen «TasqalaTransGaz» JShS dırektory Tilek Mahmetovke rızashylyǵyn bildirdi. Páter ıelerine kilt tapsyrǵannan keıin oblys ákimi úılerge kirip, mereke kúngi qýanyshtaryna ortaqtasty. Eger páterdiń kem-ketikteri bolsa, merdiger mekemege habarlasýy kerektigin jetkizdi.

«Qarjy jınap, úsh bólmeli páterge qol jetkizip jatyrmyn. Ózim vahtalyq ádispen Teńiz kenishinde jumys isteımin, jarym, kishkentaı balam bar. Ata-anam, ini-qaryndasymmen birge turamyn. Nesıeni 12 jylǵa aldym, alty jyldan keıin baǵasy jeńildeıdi, aıyna 38 myń teńge tóleıtin bolamyn. Qoljetimdi, rızamyz. Osy aýdanda mektep, balabaqsha, sport keshenderi bar. Bári de qolaıly», dedi QazAqparat tilshisine Elhan Lesqalı.

Sol sekildi qala turǵyny Aıgúl Erkeshtaeva da «Nurly jer» baǵdarlamasy aıasynda eki bólmeli páterge ıe bolyp, kóp jyldan beri kózdegen maqsaty oryndalyp jatyrǵanyn jetkizdi.

Eske sala keteıik, budan buryn Oralda 200-ge jýyq otbasy baspanaly bolǵanyn jazǵan edik.