Oralda tóbelesip jatqandardy aıyrǵan ájege qurmet kórsetildi
ORAL. QazAqparat - Keshe saǵat 12.30 shamasynda Tsıolkovskıı kóshesi aıaldamasy, «Jaıyq» bazary mańynda jastardyń top bolyp tóbelesýi oryn aldy. Osy oqıǵa kezinde jastardy aıyrǵan 1942 jylǵy zeınetker Baqtyly Ájmaǵambetovaǵa búgin qurmet kórsetildi, dep habarlaıdy «QazAqparat» tilshisi.
BQO ІІD jergilikti polıtsııa qyzmetiniń basshysy, polıtsııa polkovnıgi Manarbek Ǵabdýllın jasy 75-ten assa da, qoǵamdyq tártipti saqtaýda belsendilik tanytqan zeınetkerge gúl shoǵy men baǵaly syılyq tabys etti. Endi oǵan aqshalaı syılyq ta beriletin bolady.
«Ony sol aınaladaǵy jurt Klava ájeı dep ataıdy eken. Ómir boıy tynbaı eńbek etken, kombaın aıdaǵan, sodan keıin qaladaǵy et kombınatynda jumys jasaǵan. Sol kúni bazardan qaıtyp kele jatqan kezde tóbelesip jatqan jastardy kórip, arasha túsken. Olardyń bireýiniń qolynda kirpish bolǵan. Bireýi qulaǵan kezde bári jabylyp, tebe bastaǵan. Ájeı ózi qulap qalsa da, qaıta turyp, aıyrýdan tanbaǵan. Muny áleýmettik jeli arqyly taraǵan beınerolıkten kórýge bolady. Al osy kezde tóbelesip jatqandardy kórip, esh áreketke barmaǵan er adamdar da bolǵan. Onyń qasynda jasy ulǵaıǵan ananyń bul isi úlgi etýge turarlyq. Eger ol kisi aıyrmaǵanda, sońy qaıǵyly jaǵdaımen aıaqtalýy múmkin edi», dedi «QazAqparat» tilshisine M.Ǵabdýllın.
Aıta keteıik, osy tóbeleske baılanysty úsh kúdikti ýaqytsha oqshaýlaý ızolıatoryna qamaldy. QR QK 293-baby 2-bólimine sáıkes (buzaqylyq) qylmystyq is qozǵalyp, tergeý amaldary júrgizilýde.
