Oralda tóbeles kezinde er adamnyń qulaǵyn kesip alǵan turǵyn sottaldy

ORAL. KAZINFORM – Oral qalalyq sotynda A. degen turǵynǵa qatysty QR QK 107-baby 2-bóligi 5-tarmaǵyna sáıkes úkim shyqty.

BQO sotynyń baspasóz qyzmetinen málim etkenindeı, atalmysh turǵyn 2024 jyldyń qazan aıynda túngi saǵat 02.00-de kafege demalýǵa barǵan. 

Kafede budan buryn birneshe ret kezdestirgen Sh-nyń dostarymen ishimdik iship otyrǵanyn kórip, sálemdesken. Sol kezde tanysy ústelge otyrýdy usynǵanda, bul kelisip, birge ishimdik ishýge kirisken.

Odan ári Sh. men A. arasynda kelispeýshilik týyndap, syrtqa shyqqannan keıin tóbeles bastalǵan. A. taıaý mańdaǵy kólik jýý ortalyǵyna qaraı qasha jónelgen. Ashyq turǵan kólik jýý ortalyǵyna kirip, ústelden asúı pyshaǵyn alyp, syrtqa qaraı shyqqan. Sosyn qarsy júgirip kelgen Sh., T., jáne N. degen er adamdy kórip, tyǵyp qoıǵan pyshaǵyn alyp, Sh-ǵa qaraı sermegen. Sh-nyń inisi N. qorǵaý maqsatymen A-nyń qolyn ustap qalǵan. Sol sátte sottalýshy N-ǵa qaraı qasaqana pyshaǵyn kóterip, onyń sol jaq qulaǵyn kesip alǵan.

- A. densaýlyqqa qasaqana aýyrlyǵy ortasha zııan keltirgeni úshin jábirlenýshi N. sottalýshydan 10 mln teńge moraldyq zııan jáne 40 myń teńge materıaldyq shyǵyn óndirý týraly azamattyq talap aryz berdi. Sottalýshy kinásin moıyndap, jasaǵan isine tolyq ókinetinin bildirdi. Sot A-ny kináli dep tanyp, odan 1 mln teńge moraldyq zııan jáne 40 myń teńge materıaldyq shyǵyn óndirip, 3 jylǵa bas bostandyǵynan aıyrý jazasyn taǵaıyndady. Úkim zańdy kúshine engen joq, - dep habarlady vedomstvodan.

Eske sala keteıik, budan buryn BQO-da jolaýshy qaza taýyp, júrgizýshiniń sottalǵanyn jazǵan edik.