Oralda tirkelmegen dinı birlestiktiń zańsyz qyzmeti áshkerelendi
BQO polıtsııa departamentiniń ekstremızmmen kúres basqarmasynan túsken málimetke qaraǵanda, dinı birlestikti quryp, oǵan basshylyq etken eki turǵyn jaýapqa tartyldy.
QR Ákimshilik quqyqbuzýshylyq kodeksiniń 489-babyna sáıkes Oral qalasynyń 1988 jylǵy N. jáne 1986 jylǵy I. degen turǵyndaryna qatysty hattama toltyrylyp, árqaısysyna 145 850 teńge aıyppul salyndy. Olardyń ekeýi de tirkelmegen, protestanttyq baǵyttaǵy dinı aǵymdy ustanǵan. Qalǵan kelýshilermen aldyn alý áńgimeleri júrgizildi.
Atalǵan dinı birlestik ekstremızmmen kúres basqarmasy qyzmetkerleriniń nazaryna 2019 jyly ilikken. Sol kezde birlestik basshylary ákimshilik jaýapkershilikke tartylyp, olarǵa tıisti organda mindetti túrde tirkelý kerektigi týraly eskertilgen.
Soǵan qaramastan, bıyl osy dinı aǵymdy ustanatyndar N-nyń jeke úıinde jınalǵan. Polıtsııa qyzmetkerleri barǵan kezde úıde 15-ten astam eresek adam jáne onǵa jýyq bala bolǵan. Barlyq qatysýshylar dinı ándi jappaı aıtyp otyrǵan. Demalys kúnderi qatysýshylar sany budan da kóbeıedi.
Ustalǵandardan aqparattyq paraqshalar men kitapshalar tárkilendi.
BQO polıtsııa departamentiniń ekstremızmmen kúres basqarmasy oblys turǵyndaryna qyraǵylyq tanytyp, dástúrli emes dinı aǵymdarǵa ilespeý, zańsyz jıyndarǵa qatyspaý kerektigin, munyń sońy qaterli jaǵdaıǵa soqtyrýy múmkin ekendigin eske salady.
