Oralda test nátıjelerin burmalaý arqyly zańsyz tabys tapqandar sottaldy
ORAL. KAZINFORM — Oral qalalyq sotynda densaýlyq saqtaý salasyndaǵy mamandardyń kásiptik daıarlyǵyn baǵalaýdyń aqparattyq júıesine kórineý jalǵan aqparatty qasaqana zańsyz engizgeni úshin kináli dep tanylǵan tórt adamǵa úkim shyqty.
BQO sotynyń baspasóz qyzmetinen málim etkenindeı, sottalýshylardyń bireýi «Ulttyq táýelsiz emtıhan ortalyǵy» RQB (UTEO) BQO boıynsha óńirlik sarapshysy bolyp jumys istegen.
Ol 2018–2025 jyldar aralyǵynda exam.ncie.kz aqparattyq júıesinde attestatsııalyq testileýden ótý kezinde jekelegen medıtsına qyzmetkerlerine zańsyz kómek kórsetý shemasyn uıymdastyrǵan. Qylmystyq oıdy júzege asyrý úshin óziniń kómekshisin, sondaı-aq IT-tehnologııalar salasyndaǵy eki mamandy tartqan.
Sarapshy jalpy basshylyqty, kandıdattardy izdeýdi, aqshalaı qarajatty alýdy jáne olardy bólýdi júzege asyrǵan. Kómekshisi kandıdattardy izdeýge, aqsha jınap, testileýdi uıymdastyrýǵa qatysqan. Al qalǵan ekeýi qashyqtan qol jetkizý baǵdarlamalary (AnyDesk, Radmin) arqyly emtıhan kompıýterlerine qashyqtan qosylyp, test materıaldaryn zańsyz kóshirgen jáne kandıdattardyń atynan durys jaýaptardy engizip otyrǵan.
Osylaısha, testileýdi burmalaǵany úshin kandıdattardan alynǵan qarajattyń jalpy somasy 4 mln 032,000 myń teńgeden asqan.
Jalǵan málimetterdi engizý saldarynan bilimi men daǵdylary dáleldenbegen medıtsına qyzmetkerleri zańsyz túrde biliktilik sanattary men sertıfıkattar alǵan. Osy qujattardyń negizinde bıýdjet jáne jumys berýshiler qarajaty esebinen olarǵa 16 mln 524,446 myń teńge kóleminde laýazymdyq aqylaryna qosymsha aqy tólengen.
Sonymen qatar «Ulttyq táýelsiz emtıhan ortalyǵy» RQB-nyń iskerlik bedeline nuqsan keltirilgen. Mekeme oǵan qosa qarjylaı shyǵynǵa qalǵan.
— Sottalýshylar kinálaryn tolyqtaı moıyndap, jasaǵan isterine ókinish bildirdi jáne isti qysqartylǵan tártippen qaraýdy surady. Atalǵan qylmystyq quqyq buzý shaǵyn aýyrlyqtaǵy qylmystar sanatyna jatady. Sot úkimimen olardyń barlyǵyna 1 jylǵa bostandyǵyn shekteý jazasy kesildi. Biraq tórteýi de raqymshylyqqa iligip, negizgi jazadan (bostandyqty shekteý) bosatyldy. Úkim zańdy kúshine engen joq, — dep habarlady vedomstvodan.
Eske sala keteıik, budan buryn BQO aýrýhanasy sapasyz qyzmet úshin marqumnyń týystaryna ótemaqy tóleıtin bolǵanyn jazǵan edik.
