Oralda termınal arqyly aqsha jymqyrǵan kúdiktiler izdestirilýde
ORAL. QazAqparat - Oralda termınal arqyly aqsha jymqyrǵan eki kúdikti izdestirilip jatyr, dep habarlaıdy QazAqparat tilshisi.
Oral qalasy polıtsııa basqarmasy bastyǵynyń birinshi orynbasary Nurlan Bısenovtiń aıtýynsha, aldyn ala málimet boıynsha bul eki er adam Reseıden kelgen.
Olardyń is-qımyly mynadaı bolyp keledi. Betperde kıgen kúıinde «24 saǵat» bankomatyna kelip, ózderiniń 10 myńdyq aqshasyn kýpıýra qabyldaǵyshqa juqa lentamen salady. Termınal eseptegen kezde ekranǵa ózderiniń telefon nómirlerin terip, aqshany soǵan jiberedi. Sodan keıin kýpıýrany sýyryp alady da, taıyp turady.
«Bul - alaıaqtyqtyń jańa túri. Termınaldarynyń tonalǵany jóninde kásipkerlerden bir aptada toǵyz, sońǵy táýlikte úsh shaǵym tústi. Olardyń qansha aqshasynan aıyrylǵany naqtylanýda. Sondyqtan turǵyndar «24 saǵat» bankomaty janynan kúdiktilerdi baıqasa, «102» telefonyna habarlasýyn suraımyz», dedi Nurlan Bısenov. 
