Oralda terezeden qulaǵan eki balanyń bireýi aýyr jaǵdaıda jatyr
ORAL. KAZINFORM — Oral qalasynda sońǵy kezde eki balanyń terezeden qulaǵany tirkeldi.
BQO TJD tótenshe jaǵdaılardyń aldyn alý basqarmasynyń bastyǵy Nuraly Músıevtiń óńirlik kommýnıkatsııalar qyzmeti alańynda ótken brıfıngte málim etkenindeı, ekinshi qabattan qulap ketken bala dárigerler qaraǵannan keıin úıine jiberilgen.
Onyń sózine qaraǵanda, úshinshi qabattan qulaǵan balanyń jaǵdaıy aýyr. Esin jıǵan ol qazirgi kezde aýrýhanada em alyp jatyr.
- Bul derekter atalǵan máseleniń ózekti ekendigin jáne aldyn alý sharalaryn kúsheıtý qajettigin kórsetedi. Ásirese, kópqabatty turǵyn úılerdiń terezelerinen balalardyń qulaý jaǵdaılary erekshe alańdaýshylyq týǵyzýda. Osyǵan baılanysty oblys kóleminde profılaktıkalyq is-sharalar júıeli túrde júrgizilýde. Búgingi tańda «Qaýipsiz tereze» aktsııasy aıasynda keń aýqymdy túsindirý jumystary uıymdastyrylýda. Halyq arasynda qaýipsizdik sharalaryn nasıhattaý maqsatynda reıdtik is-sharalar ótkizilýde, - dedi N.Músıev.
Basqarma bastyǵynyń aıtýynsha, qoldanystaǵy normatıvtik talaptarǵa sáıkes tereze bloktary arnaıy qaýipsizdik qulyptarymen nemese olardyń erkin ashylýyn shekteıtin qurylǵylarmen jabdyqtalýy tıis. Bul talaptar balalardyń terezeden qulaýyna jol bermeý jáne jaraqattanýynyń aldyn alý maqsatynda engizilgen.
BQO bilim basqarmasy basshysynyń orynbasary Saıagúl Ǵalıeva sońǵy jyldary mundaı jazataıym oqıǵalardyń azaımaı otyrǵanyn jetkizdi. Ásirese, 2 men 5 jas aralyǵyndaǵy balalar qaýip tobyna jatady. Bul – baldyrǵandardyń qyzyǵýshylyǵy joǵary, biraq qaýip-qaterdi tolyq baǵalaı almaıtyn kezeń.
- Negizgi sebepterge toqtalsaq, eń aldymen, bul – eresekter tarapynan baqylaýdyń jetkiliksizdigi. Sonymen qatar terezelerde qorǵanys quraldarynyń bolmaýy, jıhazdyń tereze mańyna durys ornalastyrylmaýy jáne moskıt torlaryna sený úlken qaýip týdyrady. Osyǵan baılanysty bilim basqarmasy tarapynan balalardyń qaýipsizdigin qamtamasyz etý maqsatynda birqatar júıeli sharalar júzege asyrylýda, - dedi S.Ǵalıeva.
Onyń málimdeýinshe, birinshiden, barlyq bilim berý uıymdarynda balalarǵa qaýipsiz minez-qulyq daǵdylaryn qalyptastyrýǵa baǵyttalǵan túsindirý jumystary júrgizilýde. Mektepterde «Qaýipsiz úı» taqyrybynda synyp saǵattary ótkizilse, balabaqshalarda oıyn arqyly qaýipsizdik daǵdylary úıretiledi.
Ekinshiden, ata-analarmen jumys kúsheıtilýde. Ata-analar jınalystarynda, chattarda jáne áleýmettik jelilerde tereze qaýipsizdigi týraly jadynamalar men keńester turaqty túrde taratylýda.
Eske sala keteıik, budan buryn Oralda bir kúnde eki balanyń kópqabatty úıdiń terezesinen qulap ketkenin jazǵan bolatynbyz.
