Oralda tender ótkizý kezinde básekelestikke qarsy áreketke jol berilgen

ORAL. KAZINFORM - Memlekettik satyp alý kezinde Oral qalasy turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi tarapynan básekelestikke qarsy is-qımyl derekterine jol berilgeni anyqtaldy.

Zańger, BQO qoǵamdyq keńesiniń múshesi Baýyrjan Ahmetjannyń Feısbýk áleýmettik jelisindegi paraqshasynda málim etkenindeı, ol oblys prokýrory Serik Shalabaevtyń atyna bıýdjet qarajatyn tıimdi paıdalaný jáne básekelestikti damytý jóninde hat jazǵan.

Hatynda Oral qalasy kóshe-jol jelisin kútip ustaý jáne sanıtarlyq tazalaý úshin shahardy birneshe bólikke bólý, osy jumystardy jalǵyz ózi atqaratyn kompanııa-monopolıske qatysty prokýrorlyq tekseris júrgizý kerektigin kórsetken.
Osyǵan oraı BQO prokýrorynyń birinshi orynbasary Dáýren Omarǵalıevten kelgen jaýapta atalǵan bólim qyzmetine taldaý júrgizilgeni aıtylǵan.

«Nátıjesinde QR Básekelestikti qorǵaý jáne damytý agenttigi BQO boıynsha departamentine Oral qalasyn sanıtarııalyq tazartý jónindegi lottardyń básekelestikti qorǵaý salasyndaǵy zańnamaǵa sáıkestigi turǵysynan tergeý taǵaıyndaý týraly talap joldandy. Departamentpen júrgizilgen tergep-tekserý qorytyndysy boıynsha memlekettik satyp alýdy ótkizý kezinde bólim tarapynan básekelestikke qarsy is-qımyl derekteri anyqtaldy. QR Kásipkerlik kodeksiniń 226-baby 1-tarmaǵy 2) tarmaqshasyna sáıkes departament básekelestikti qorǵaý salasyndaǵy QR zańnamasyn buzýshylyqtardy joıý týraly nusqama engizdi (qaralý satysynda). Sonymen qatar bólimniń burynǵy basshysy Jandos Dúısenǵalıev QR Ákimshilik quqyq buzýshylyq kodeksi 163-baby 1-tarmaǵyna sáıkes ákimshilik jaýapkershilikke tartyldy», delingen resmı jaýapta. 

B.Ahmetjannyń naqtylaýynsha, J.Dúısenǵalıevke 1 mln 107,6 myń teńge nemese 300 AEK kóleminde aıyppul salynǵan.

Osy máselege baılanysty QR Básekelestikti qorǵaý jáne damytý agenttigi BQO boıynsha departamentiniń basshysy Salavat Vahıtovtiń jaýabynda Oral qalasy turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń kóshelerdi kútip-ustaý jáne sanıtarlyq tazalaý jumystarynyń barlyǵyn bir lotqa biriktirip, Kásipkerlik kodeksiniń 194-babynyń talaptaryn buzǵany atap kórsetilgen. Atalǵan lot boıynsha memlekettik satyp alý kezinde talap etiletin tehnıkalyq sıpattamalar kúrdelendirilgen. 

«Osylaısha, Oralda kóshe-jol jelisin kútip ustaý jáne qalany sanıtarlyq tazalaý jumystaryna memlekettik satyp alýdy ótkizý kezinde básekelestikke qarsy áreket jasalǵany anyqtalyp otyr. Monopolıst mekeme «Jaıyq Taza qala» JShS-ǵa toǵyz jylda 25,4 mlrd teńge bólingen. Elimizdiń basqa qalalarynda osy jumystardyń qalaı atqarylatynyn surastyryp kórdim. Mysaly, Aqtóbe 24 ýchaskege bólingen, 17 merdigerlik mekeme qyzmet atqarady. Sol sekildi Almaty qalasynda qysqy kezeńde kóshe-jol jelisin 10 merdiger uıym tazalaıdy. Oralda solaı jasaýǵa ne kedergi?», deıdi B.Ahmetjan.

Eske sala keteıik, budan buryn qala kósheleriniń durys tazalanbaýyna baılanysty Oral ákimdigi jaýap bergenin jazǵan bolatynbyz.