Oralda teatr tarlany Telman Imashevke eskertkish taqta ornatyldy
ORAL. QazAqparat - Oralda teatr tarlany Telman Imashev (1956-2004) turǵan úıge eskertkish taqta ornatyldy, dep habarlaıdy QazAqparat tilshisi.
Batys Qazaqstan oblystyq qazaq drama teatrynyń beldi akterleriniń biri bolǵan Telman Imashev Muhıt kóshesi 80-úıde turdy. Halyqaralyq teatr kúnine oraı búgin osy úıdiń qabyrǵasyna ornatylǵan eskertkish taqtany ashý rásimi boldy.
Jıynda oblystyq mádenıet, arhıvter jáne qujattama basqarmasynyń basshysy Qadyrbolat Musaǵalıev, marqummen kóp jyldar boıy jumystas bolǵan belgili ánshi ári aıtysker aqyn, Qazaqstannyń eńbek sińirgen qaıratkeri Hatımolla Berdiǵalıev, Telmannyń zaıyby, bı mamany Slana Imasheva jáne basqalar estelikterimen bólisti. Olar Telman Satqanulynyń teatr isine jan-tánimen berilgen kásibı ártis, óner salasynda aıshyqty iz qaldyrǵan tekti tulǵa ekendigin jetkizdi.
1956 jyly Qaztalov aýdany Qaraoba aýylynda dúnıege kelgen Telman Imashev 1981 jyly T.Júrgenov atyndaǵy teatr-kórkemsýret ınstıtýtynyń akterlik bólimine túsip, ataqty óner tarlany Hadısha Bókeevadan tálim aldy.
Eńbek jolyn S.Seıfýllın atyndaǵy Qaraǵandy oblystyq qazaq drama teatrynda bastaǵan jas maman 1983 jyly A.Seleznev atyndaǵy Almaty bı ýchılışesiniń túlegi Slanamen bas qosyp, týǵan jerine oraldy. Alty jyl Qaztalov aýdandyq mádenıet úıi janyndaǵy halyq teatrynda, keıin 1989-1993 jyldary oblystyq halyq shyǵarmashylyǵy ortalyǵynda bas maman bolyp eńbek etti.
1993 jyly Oralda qazaq drama teatry ashylǵannan bastap Telman Imashev osynda akter, trýppa meńgerýshisi retinde mańdaı terin sypyra qyzmet etip, kóptegen rolderdi somdady. 1993 jyly 16 jeltoqsanda teatr shymyldyǵyn ashqan M.Áýezovtiń «Qaragóz» tragedııasynda Naýshanyń ákesi Jabaıdyń beınesin alyp shyqsa, S.Asylbekovtiń «Bir túngi oqıǵa» dramasynda Tımýr Qaldybaıulyn kópke tanytty. 1998 jyly osy spektakldi qoıǵany úshin BQO teatry Tarazda ótken respýblıkalyq teatrlar festıvalinde jeńimpaz atandy. Sahnanyń qyr-syryn sheber meńgergen akter sondaı-aq T.Ahtanovtyń «Ant» tarıhı dramasynda Ábilqaıyr hannyń, Iran-Ǵaıyptyń «Mahambet» tragedııasynda Jáńgir hannyń beınelerin shynaıy kórsete bildi.
2004 jyly nebári 48 jasynda kenetten dúnıeden ozbaǵanda, Telman Imashevtiń alar asýlary budan da mol bolary anyq edi. Ol óziniń isin jalǵastyrar shákirtter de tárbıeledi.
