Oralda teatr qaıratkeri Qujyrǵalı Tóleýishevtiń 70 jyldyǵy atalyp ótildi
ORAL. QazAqparat - Batys Qazaqstan oblystyq qazaq drama teatrynda elge tanymal mádenıet salasynyń ardageri, osy teatrdy jıyrma jylǵa jýyq basqarǵan qaıratker, Qazaqstan Jýrnalıster odaǵynyń múshesi Qujyrǵalı Tóleýishevtiń 70 jyldyǵy atalyp ótildi, dep habarlaıdy «QazAqparat» HAA tilshisi.
Kórshiles Atyraý oblysy qazirgi Qurmanǵazy aýdany Súıindik aýylynda (Súıindik, Balqudyq aýyldary 1952 jyly qazaq jeri Kapýstın ıAr men Azǵyr polıgonyna berilgenge deıin Orda aýdanynyń qaramaǵynda boldy) 1947 jyly dúnıege kelgen Qujyrǵalı Tóleýishev Oral pedagogıkalyq ınstıtýtynyń tarıh-fılologııa fakýltetin bitirgennen keıin eńbek jolyn oblystyq telearnada dıktor bolyp bastady. 1974 jyly Mańǵystaý oblysyna qonys aýdaryp, oblystyq atqarý komıteti men partııa komıtetinde laýazymdy qyzmetter atqardy. 1984 jyly oblystyq mádenıet basqarmasynyń basshysy bolyp taǵaıyndaldy. Keıin Atyraý men Mańǵystaý oblysy biriktirilgen kezde de osy qyzmetti abyroımen atqara bildi. 1993 jyly Oral qalasynda uzaq ýaqyt úzilisten keıin oblystyq qazaq drama teatry qaıta ashylǵany belgili. Mine, osy qara shańyraqqa jetekshilik etý jóninde usynys túsken kezde Qujyrǵalı Tóleýishev elge oralýdy jón kórdi. Sóıtip 1996 jyldan jıyrma jylǵa jýyq ýaqyt boıy Batys Qazaqstan oblystyq qazaq drama teatryn basqaryp, ony bıik belesterge kótere bildi. Qazaq teatrynyń ǵımaraty Oraldyń qaq ortasynan salynǵan kezde onyń basy-qasynda boldy. Teatr respýblıka qalalarynda óner kórsetip qana qoımaı, shetelderge de gastroldik saparǵa shyǵyp, rejısserler men ártisterdiń sheberligin shyńdaýǵa jaǵdaı jasaldy. Ásirese, teatr repertýarynyń jańarýyna barynsha mán berildi. Bul rette dırektordyń ózi de kóptegen pesany qazaq tiline aýdaryp, sátti spektaklder qoıyldy. Mysaly, «Kalıgýla» spektakli úshin teatr rejısseri Muqanǵalı Tomanov Aqtaý qalasynda 2008 jyly ótken HVІ respýblıkalyq teatrlar festıvalinde «Eń úzdik debıýt» atalymyna ıe boldy. Al Grıgorıı Gorınniń «Atyń óshkir Gerostratyn» qoıǵan (rejısseri M.Tomanov) teatr 2012 jyly Qostanaı qalasynda ótken Іlııas Omarovtyń 100 jyldyǵyna arnalǵan respýblıkalyq teatrlar festıvalinde aıdy aspanǵa shyǵaryp, segiz atalymnyń jeteýin ıelenip qaıtty.
Saltanatty shara barysynda Qujyrǵalı Tóleýishevtiń Batys Qazaqstan, Mańǵystaý jáne Atyraý oblystarynyń mádenıet salasyna sińirgen eńbegi erekshe ekendigi aıtyldy. Kesh ıesiniń taǵy bir qyry, Qazaqstan Jýrnalıster odaǵynyń múshesi retinde kókeıkesti máselelerdi kóterip, merzimdi basylymdarǵa maqala jazýǵa da ýaqyt tabady.
BQO mádenıet, muraǵattar jáne qujattama basqarmasynyń basshysy Dáýletkereı Qusaıynov Q.Tóleýishevtiń Oraldaǵy qazaq teatrynyń aıaǵynan tik turýyna qosqan úlesi mol ekendigin atap ótip, oblys ákimi Altaı Kólginovtiń alǵyshatyn tabys etti. Sondaı-aq N.Jantórın atyndaǵy Mańǵystaý oblystyq mýzykalyq drama teatrynyń dırektory Nurnııaz Muqanov, S.Seıfýllın atyndaǵy Qaraǵandy oblystyq qazaq drama teatrynan arnaıy kelgen Qazaqstannyń eńbek sińirgen ártisi, Memlekettik syılyqtyń laýreaty Keńes Jumabekov, astanalyq rejısser, Qazaqstannyń eńbek sińirgen qaıratkeri Nurlan Jumanııazov, Atyraý oblystyq Mahambet atyndaǵy qazaq drama teatrynyń dırektory Berik Jámenov shynaıy tilekterin jetkizdi.
Keshte Qazaqstannyń eńbek sińirgen qaıratkerleri, teatrdyń kórkemdik jetekshisi Bıbigúl Isalıeva, memlekettik «Daryn» jastar syılyǵynyń ıegeri Ásel Mámbetova, halyqaralyq jáne respýblıkalyq baıqaýlardyń laýreaty Marat Sarbópeev, mádenıet salasynyń úzdigi Temirjan Mataev áýelete án shyrqady. Oǵan qosa Q.Tóleýishev tárjimalaǵan týyndylar boıynsha qoıylǵan spektaklderden úzindiler kórsetildi.
«Ózim teatrmen bite qaınasyp ketkendikten, zeınetke shyqsam da, onymen janym birge dep aıta alamyn. Jyldar boıy aýdarǵan dúnıelerim eki tomǵa jetip qalady. Sonymen qatar ózekti taqyrypqa pesa jazyp júrmin. Osynyń bári kitap bolyp, baspa júzin kórse deımin», dedi «QazAqparat» tilshisine Q.Tóleýishev.
