Oralda tájik-aýǵan shekarasynda qaza tapqandardy eske alýǵa arnalǵan týrnır ótti
ORAL. QazAqparat - «Batys» óńirlik qolbasshylyǵyna qarasty 5517-áskerı bóliminde tájik-aýǵan shekarasynda erlikpen qaza tapqan 17 jaýyngerdi eske alýǵa arnalǵan voleıboldan dástúrli týrnır ótti, dep habarlaıdy QazAqparat tilshisi.
QR Ulttyq ulanynyń «Batys» óńirlik qolbasshylyǵy men BQO boıynsha tájik-aýǵan shekarasyndaǵy áskerı is-qımyldar qatysýshylarynyń odaǵy uıymdastyrǵan jarysqa barlyǵy alty komanda qatysyp, baq synady.
Qatysýshylarǵa «Batys» óńirlik qolbasshysynyń orynbasary, polkovnık Pavel Sıtnıkov, BQO boıynsha tájik-aýǵan shekarasyndaǵy áskerı is-qımyldar qatysýshylary odaǵynyń tóraǵasy Dáribek Súleımenov, «Batys» óńirlik qolbasshylyǵy ardagerler keńesiniń tóraǵasy, doǵarystaǵy podpolkovnık Baqytjan Berdıev sáttilik tilep, tájik-aýǵan shekarasynda qaza bolǵan qazaqstandyq jaýyngerlerdiń erligi eshqashan umytylmaıtynyn atap ótti.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, týrnır qorytyndysynda tájik-aýǵan shekarasynda áskerı is-qımyldar ardagerleriniń «KAZBAT» komandasy jeńimpaz atandy. Jáńgir han atyndaǵy Batys Qazaqstan agrarlyq-tehnıkalyq ýnıversıteti áskerı kafedrasynyń voleıbolshylary ekinshi, 5517-áskerı bóliminiń komandasy úshinshi orynǵa ıe boldy. Júldegerler kýbok, dıplomdarmen, medaldarmen marapattaldy.
Aıta keteıik, 1995 jyly 7 sáýirde tájik-aýǵan shekarasyndaǵy Pshıhvar shatqalynda Qazaqstan ishki áskeriniń 17 jaýyngeri erlikpen qaza tapqan bolatyn. Atap aıtqanda, Erjan Ábdıev, Erjan Baıbaǵysov, Erkin Baıǵabylov, Qalmaqan Baqbaev, Erbol Bekebaev, Baýyrjan Dalabaev, Jaqsylyq Jansúgirov, Imomaddın Jumatov, Qanat Edyryshov, Erbol Isabaev, Radık Qaımýldıev, Mıhaıl Martynenko, Erkebulan Maqajanov, Anatolıı Meshkov, Dastan Nurmetov, Álıhan Ógizbaev, Tahır Rahymjanov sol qandy shaıqasta kóz jumsa, otyzdan astam jaýynger jaraqat aldy. Qaza tapqandardyń bári ekinshi dárejeli «Aıbyn» ordenimen marapattaldy.
Solardyń biri shyńǵyrlaýlyq serjant Radık Qaımýldıev edi. Qazirgi tańda Shyńǵyrlaý aýdany ortalyǵynda R.Qaımýldıevtiń ózi turǵan kóshe onyń esimimen atalady. Sondaı-aq, jýyrda Shyńǵyrlaý mektebi janynda erjúrek jaýyngerge arnalǵan eskertkish taqta da ornatyldy.
