Oralda Táýelsizdik kúni qarsańynda 12 jańa avtobýs jolǵa shyqty

Oral qalasynda qoǵamdyq kólik qatary 12 jańa avtobýspen tolyqty, dep habarlaıdy Kazinform.

Bulardyń altaýy – «Yutong» markaly úlken klasty avtobýstar. Qalǵany – «Vektor Next» avtobýstary.

Qala ákimdiginen túsken málimetke qaraǵanda, jańa avtobýstardy eki tasymaldaýshy kompanııa — «Batys Qazaqstan avtobýs parki» JShS jáne «Alyı parýs» JShS satyp alǵan. Olar №2, 3, 4 jáne 14 marshrýttar boıynsha jolaýshylardy tasymaldaıdy.

Oral shahary jyl saıyn jańa avtobýstarmen tolyǵýda. Bul jumystar jol aqysyn tóleýdiń elektrondyq júıesin engizýdiń jáne áleýmettik mańyzy bar marshrýttarda tasymaldaýshylardyń shyǵyndaryn sýbsıdııalaýdyń arqasynda múmkin bolyp otyr.

Jańa qoǵamdyq kólikterdi tapsyrý rásimine Oral qalasynyń ákimi Mırjan Satqanov qatysty. Shahar basshysy oraldyqtardy Táýelsizdik kúni merekesimen quttyqtap, jańa avtobýs kiltterin júrgizýshilerge tabys etti.

Qala basshysy mundaı jumystar jańa jylda jalǵasatynyn, turǵyndar jıi shaǵym aıtatyn №7 sekildi baǵyttarǵa da jańa avtobýstar satyp alý kózdelip otyrǵanyn jetkizdi.

Jelige qosylǵan «Yutong» markaly jańa avtobýstar múgedektigi bar jandarǵa qyzmet kórsetýge beıimdelgen, kondıtsıonermen, kúsheıtilgen jylytý júıesimen jáne beınekameramen jabdyqtalǵan.

Eske sala keteıik, budan buryn Oralda qoǵamdyq kólikterde jolaqy baǵasy kóteriletinin jazǵan bolatynbyz.