Oralda Táýelsizdiktiń 30 jyldyǵyna oraı jańa mektep paıdalanýǵa berilmek

ORAL. QazAqparat – Táýelsizdiktiń 30 jyldyǵyna oraı Oral qalasynda №33 orta mektep ǵımaraty paıdalanýǵa berilmekshi, dep habarlaıdy QazAqparat tilshisi.

BQO qurylys basqarmasynyń basshysy Álibek Antazıevtiń aıtýynsha, jańa mektepti 14 jeltoqsanda ashý josparlanyp otyr.

Qazirgi kezde ǵımarattyń qurylysy 99 paıyzǵa aıaqtalǵan. Tek ishin jınaý, syrlaý, lınoleým tóseý jumystary júrgizilýde.

Á.Antazıevtiń sózine qaraǵanda, pandemııaǵa jáne qurylys materıaldarynyń qymbattaýyna baılanysty mektep qurylysy úsh aıdaı ýaqytqa keshikti.

«Jyl saıyn mektepter qurylysyna oblysqa 2 mlrd teńge bólinedi. Mysaly, 600 oryndyq mektepti salý úshin 2,2 mlrd teńge kerek. Sondyqtan oblystaǵy apatty jáne úsh aýysymdyq mektepter máselesin sheshý úshin jeke ınvestorlar da tartylýda. Osy baǵytta Oraldaǵy №31 orta mektep qurylysyn «Qazhol» JShS qolǵa aldy. Ony kelesi jyldyń aıaǵyna deıin salyp bitirmek», dedi Á.Antazıev.

Kúni búgin barlyq qarjy kózderi esebinen oblys boıynsha 10 bilim berý nysanynyń qurylysy júrgizilýde. Sonyń ishinde ekeýi respýblıkalyq bıýdjetten beriletin sýbventsııa esebinen, tórteýi «2020-2021 jyldarǵa arnalǵan jumyspen qamtýdyń jol kartasy» baǵdarlamasıa aıasynda, eki mektep jergilikti qazyna qarjysyna, taǵy ekeýi jeke ınvestıtsııa arqyly boı kóterýde. Bulardyń tórteýi oblys ortalyǵynda, altaýy aýdandarda ornalasqan.

Bıyl 8 mekteptiń qurylysyna barlyǵy 4 860,7 mln. teńge qarajat bólindi.

Eske sala keteıik, budan buryn BQO-da paıdalanylmaı jatqan 174 myń gektar jerdiń memleketke qaıtarylǵanyn, 418 myń sharshy metr turǵyn úıdiń paıdalanýǵa berilgenin jazǵan bolatynbyz.