Oralda tatar etnomádenı birlestiginiń kúni márege jetti

ORAL. QazAqparat - Oraldaǵy Dostyq úıinde el táýelsizdiginiń 25 jyldyǵyna, tatar halqynyń uly aqyny Ǵabdolla Toqaıdyń 130 jyldyǵyna jáne Ǵ.Toqaı murajaıynyń 10 jyldyǵyna arnalǵan tatar etnomádenı birlestiginiń kúni «Shıgrııat báıráme» atty teatrlandyrylǵan merekelik baǵdarlamamen márege jetti, dep habarlaıdy QazAqparat.

Osynyń aldynda Ǵabdolla Toqaıdyń týyndylary boıynsha «Týkaınyń monly sazy» atty balalar men jasóspirimder arasynda mánerlep oqýshylar baıqaýy uıymdastyrylǵan bolatyn. Sondaı-aq A.Ostrovskıı atyndaǵy oblystyq orys drama teatrynda M.Faızı atyndaǵy Orynbor memlekettik tatar drama teatry «Hrýstaldy Kárim» teatr festıvaliniń bas júldegeri Aıgúl Ahmetǵalıevanyń pesasy boıynsha tatar tilinde «Ýl bıt kıchá ıde» spektaklin qoıǵan edi.
Qorytyndy shara esebinde ótkizilgen «Shıgrııat báıráme» merekesinde mánerlep oqýshylar saıysynyń jeńimpaz-júldegerleri túrli atalymdar boıynsha marapattaldy. Sharaǵa 7-17 jas aralyǵyndaǵy seksennen astam ónerli jastar qatysty. Tatar tilinde de óleńder oqylyp, shyraıly jyr keshine aınaldy.
Qazaqstan halqy BQO assambleıasy tóraǵasynyń orynbasary, hatshylyq meńgerýshisi Ǵaısa Qapaqovtyń aıtýynsha, mundaı keshter túrli ult ókilderi arasyndaǵy yntymaqty nyǵaıta túsedi. Táýelsizdiktiń 25 jyldyǵyna oraı bıyl óńirde 2 myńnan astam shara ótkizildi. Oblysta 51 etnomádenı birlestik bolsa, olardyń jumysyna 7 myńdaı adam belsene aralasady. Jyl aıaǵyna deıin josparlanǵan sharalar da barshylyq.
Aıta keteıik, tatar etnomádenı birlestigi 1989 jyly qurylǵan. Oblysta 9 myńǵa jýyq tatar bar, olar túrli salada eńbek etip, óńirdiń áleýmettik-ekonomıkalyq damýyna óz úlesterin qosyp keledi.