Oralda tasqyn sý basýy múmkin saıajaılardaǵy 350 otbasyǵa habarlama berildi

ORAL. KAZINFORM — Oral qalasy aýmaǵynda 150-den astam saıajaı birlestikteri bar.

Oral qalasy ákiminiń orynbasary Jandos Dúısenǵalıevtiń málim etkenindeı, osy kezge deıin 43 saıajaı birlestiginde qysqy mezgilde turyp jatqan 350 otbasyǵa kóktemde sý basýy múmkin ekendigi jóninde habarlama berildi.

Jandos Ashatulynyń sózine qaraǵanda, kúni búgin reıdter júrgizilip, saıajaılarda turyp jatqan otbasylardyń sany naqtylaný ústinde.

Qazirgi tańda 40-tan astam saıajaı birlestigi tekserilip, bularda 900 otbasynyń turyp jatqany anyqtaldy.

«Barlyq saıajaı birlestikteri boıynsha tolyq elektrondy-aqparattyq baza jasaqtalatyn bolady. Bul saıajaılardaǵy adamdardyń, turǵynjaılardyń, úı janýarlarynyń jáne nysandardyń naqty sanyn anyqtaýǵa múmkindik beredi. Saıajaıda turyp jatqan otbasylardyń barlyǵyna eskertý habarlamalary beriletin bolady», deıdi J.Dúısenǵalıev.

Onyń aıtýynsha, bıylǵy sý tasqynynan kóptegen saıajaılardyń zardap shekkeni belgili. Osy ýaqytqa deıin keltirilgen zalaldy óteý jóninde turǵyndardan 11 myńǵa jýyq ótinish túsken.

«Kúni búginge deıin qalalyq komıssııa jalǵyz úıi apatty dep tanylǵan 2 589 azamattyń ótinishin qanaǵattandyryp, bul otbasylarǵa birinshi jáne ekinshi naryqtan baspana berildi. Sonymen qatar 487 otbasyǵa úıin jóndeý úshin 1,7 mlrd teńge qarajat bólindi. 10 942 otbasyǵa 4 mlrd teńge kóleminde bir jolǵy áleýmettik kómek (100 AEK) kórsetildi. 9 032 otbasyǵa 4,1 mlrd teńgeniń múliktik shyǵyndary (150 AEK-ke deıin) óteldi. Bul jumystar áli de jalǵasýda», deıdi qala ákiminiń orynbasary.

Eske sala keteıik, budan buryn Batys Qazaqstanda bıylǵydaı sý tasqyny qaıtalanýy múmkin ekendigin jazǵan bolatynbyz.

Sondaı-aq Batys Qazaqstanda kóktemde sý basý qaýpi bar 186 eldi meken tirkelgen.

Batys Qazaqstanda 28 sý qoımasynyń 20-sy talapqa saı kelmeıdi.