Oralda tasqyn kezinde jaramsyz kúıge túsken 700 saıajaı áli kúnge buzylmaǵan
ORAL. KAZINFORM – Oral qalasynda budan eki jyl burynǵy tasqyn kezinde saıajaıdaǵy úıleri sýǵa ketken 2 800-den astam otbasy baspanaly boldy.
Oral qalasy ákiminiń orynbasary Jandos Dúısenǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, jaramsyz bolǵan saıajaı úıleriniń 2 100-i eki jyldyń ishinde tolyqtaı buzyldy.
Jandos Ashatulynyń sózine qaraǵanda, 700-deı úı buzylmaı qalyp otyr.
- Buǵan bıýdjetten qarjy qarastyryp, buzý jumystaryn qolǵa alatyn bolamyz. Munyń sebebi – úıdi buzý úshin arnaıy tehnıka tartý qajet. Oǵan qosa qoqystar qala syrtyndaǵy qatty turmystyq qaldyqtar polıgonyna shyǵarylady, - dedi J.Dúısenǵalıev.
Onyń aıtýynsha, 2024 jylǵy sý tasqynynan keıin bos qalǵan saıajaı aýmaqtarynda qoqys kólemi kóbeıgeni baıqalady. Kóptegen turǵyndar jańa baspanaǵa kóshkennen keıin burynǵy saıajaı aýmaqtarynda ıesiz qalǵan qaldyqtar, qurylys materıaldary, turmystyq qoqys jınalyp qalǵan.
Sonymen qatar Oral qalasynda qaraýsyz qalǵan 40-qa jýyq bıznes nysandary men eski úıler bar. Eń aldymen osy nysan nemese úılerdiń qojaıyndaryn tabý kerek. Múldem tabylmaǵan jaǵdaıda qorshaý, sodan keıin buzý jumystaryn júrgizip, jerin memlekettik menshikke qaıtarý máselesi qarastyrylady.
Ákim orynbasarynyń málimdeýinshe, oblys ortalyǵynda 4 sáýir – 30 mamyr aralyǵynda sanıtarlyq-ekologııalyq aılyq jarııalandy. Aılyq barysynda qalany tolyqtaı retke keltirý, aýla, kósheler, qoǵamdyq oryndar, saıabaq, gúlzarlar, demalys aımaqtaryn tazalaý jumystary júrgiziledi. Sondaı-aq zańsyz qoqys oryndaryn joıý, qala aýmaǵyn abattandyrý men kógaldandyrýǵa erekshe mán berilmek.
- Qazirgi tańda qala aýmaǵynda ruqsat etilmegen qoqys oryndary men stıhııalyq úıindiler bar. Ásirese, Han jáne Basqaq toǵaılary sekildi demalys oryndarynda, garaj kooperatıvterinde jáne shahar shetindegi keıbir aýmaqtarda qoqys máselesi ózekti bolyp otyr. Osy oryndardyń barlyǵy sanıtarlyq aılyq barysynda kezeń-kezeńmen tazartylyp, baqylaýǵa alynady.
Turǵyndarǵa aıtarymyz – iri kólemdegi qoqystardy Oral-Saratov tas jolynyń 7-shaqyrymynda ornalasqan arnaıy orynǵa shyǵarýǵa bolady. Atalǵan oryn sanıtarlyq aılyq kezinde mundaı qaldyqtardy tegin qabyldaıdy, - dep qosty J.Dúısenǵalıev.
Eske sala keteıik, budan buryn Oralda Jaıyq ózeni jaǵasyndaǵy úıler turǵyndary kóshiriletinin jazǵan edik.
