Oralda tártip saqshylary Naýryz meıramyn toılady (FOTO)
ORAL. QazAqparat - Ulystyń uly kúnine oraı Batys Qazaqstan oblysynyń Іshki ister departamentinde «Armysyń, áz-Naýryz!» atty merekelik shara ótkizildi.
Departamenttiń baspasóz qyzmetinen túsken málimetke qaraǵanda, dástúrli sharaǵa barlyq polıtseıler atsalysyp, top-topqa bólinip, óz ónerlerin ortaǵa saldy. Naýryz meıramyna oraı arnaıy dastarhan ázirlenip, ulttyq kıim kıgen departament qyzmetkerleri merekelik baǵdarlama qoıdy. Kontsert barysynda ónerpazdar qazaq ánderin dombyranyń súıemeldeýimen shyrqasa, arqan tartý, saqına salý sekildi ulttyq oıyndar kesh ajaryn asha tústi. Merekelik dastarhannan naýryz kóje, as, qymyz, qurt, qaımaq, qazy-qarta, jal-jaıa sekildi dámdi taǵamdar oryn alyp, ulttyq oıýlarmen órnekteldi.
Departament basshylyǵynan quralǵan qazylar alqasy ár topqa baǵasyn berip otyrdy.
Departament bastyǵynyń orynbasary, polıtsııa polkovnıgi Berik Óteýlın merekemen quttyqtap, ıgi tilegin jetkizdi.
Saıys sońynda ulttyq salt-dástúrlerdi nasıhattaýǵa qosqan úlesteri úshin ár top «Úzdik dastarhan máziri, «Úzdik naýryz kóje», «Úzdik ulttyq taǵam» syndy atalymdarmen marapattalyp, sharaǵa belsene qatysyp, ónerlerin kórsetken birqatar qyzmetkerge alǵyshattar tabys etildi.
