Oralda tártip saqshylary asylyp qalǵan er adamdy qutqardy
BQO polıtsııa departamenti baspasóz qyzmetinen túsken málimetke qaraǵanda, oqıǵa 5 jeltoqsan kúni saǵat 02.00-de boldy.
«Kishkentaı qyz Oral qalasy polıtsııa basqarmasynyń kezekshi bólimine otbasynda janjal bolyp jatqanyn habarlap, kómek suraǵan. Oqıǵa ornyna ýchaskelik polıtsııa ınspektory, polıtsııa kapıtany Mıras Isataev, patrýldik polıtsııa batalonynyń qyzmetkeri, polıtsııa leıtenanty Janarys Medelhan, jedel qımyldaıtyn arnaıy jasaqtyń ınspektory, polıtsııa kapıtany Ǵadilbek Nurmuhanov shuǵyl jetken. Aýlanyń syrtqy esigi jabyq turǵandyqtan, tártip saqshylary qaqpadan sekirip kiredi. Úıdiń ishi-syrtyn teksergenmen, er azamatty tappaıdy. Tek eski saraıdy qaraǵanda, asýly turǵan er adamdy baıqap, jipten sheship alyp, alǵashqy kómek kórsetedi. Sálden soń esin jıǵan soń onyń densaýlyǵyn tolyq teksertý úshin dárigerlerdi shaqyrady.
Mamandardyń paıymdaýynsha, endi 3 mınýtqa keshikkende, er adamdy aman alyp qalý ekitalaı edi. Onyń otbasylyq janjal saldarynan ózine-ózi qol jumsamaq bolǵany anyqtaldy», dep habarlady vedomstvodan.
Bul - sońǵy kúnderi Oral qalasynda bolǵan ekinshi oqıǵa. Budan buryn tártip saqshylary mas kúıinde asylyp qalǵan er adamdy qutqarǵan bolatyn.