Oralda tarıhshy-ǵalym Tuıaqbaı Rysbekovtiń 70 jyldyǵy toılandy
ORAL. QazAqparat - Batys Qazaqstan oblystyq qazaq drama teatrynda belgili ǵalym, QR UǴA qurmetti múshesi, M.Ótemisov atyndaǵy Batys Qazaqstan memlekettik ýnıversıtetiniń qurmetti rektory, tarıh ǵylymdarynyń doktory, professor Tuıaqbaı Rysbekovtiń 70 jasqa tolýyna oraı «Qazaqstan tarıhy máseleleri jáne akademık T.Z.Rysbekovtiń ǵylymı mektebi» atty halyqaralyq ǵylymı-tájirıbelik konferentsııa ótti, dep habarlaıdy «QazAqparat» tilshisi.
Ǵalymdy mereıtoıymen oblys ákimi Altaı Kólginov quttyqtap, onyń Qazaqstan tarıhyn zertteýdegi eńbeginiń zor ekendigin jetkizdi. Elbasymyz Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda ulttyq qundylyqtardy nasıhattaý, tamyry tereń tarıhymyzdy bilý úshin ony zertteý qajettigin atap ótkeni belgili. Osy oraıda Tuıaqbaı Zeıitulynyń Qazaq eliniń tarıhyn túgendeýge qosqan úlesi mol. Tarıhshy-ǵalym kóp jyl boıy ustazdyq etip, ǵylymı eńbekterin jazyp, M.Ótemisov atyndaǵy Batys Qazaqstan memlekettik ýnıversıtetine basshylyq jasaýmen birge talantty shákirtter tárbıeleı bildi.
Shara barysynda ǵalymnyń tańdamaly eńbekteriniń bes tomdyǵynyń tusaýy kesildi.
Konferentsııada tarıh ǵylymdarynyń doktorlary, QR UǴA akademıgi Hangeldi Ábjanov, máskeýlik professor Dına Amanjolova jáne basqa ár taraptan kelgen ǵalymdar akademık Tuıaqbaı Rysbekov jáne ulttyq tarıhı ǵylym, onyń eńbekterindegi Qazaq handyǵy tarıhynyń máseleleri, ǵalymdyǵy men ustazdyǵy, ólke tarıhyndaǵy orny tóńireginde baıandamalar oqydy, jyly lebizderin bildirdi.
Konferentsııadan keıin ǵalymnyń ózi eńbek etetin ýnıversıtetinde T.Rysbekov atyndaǵy dárishana ashyldy. Munda akademıktiń eńbekteri jınaqtalyp, ulttyq tarıh taqyrybynda túrli sharalar, dárister ótetin bolady.
Aıta keteıik, Tuıaqbaı Rysbekov - 640 ǵylymı jáne ǵylymı-ádistemelik eńbekterdiń, sonyń ishinde 11 monografııa men ocherkter jınaǵynyń, 26 oqý-ádistemelik quraldardyń avtory. Onyń eńbekteri Qazaqstan ǵana emes, Anglııa, Germanııa, Reseı elderinde de jaryq kórgen.
Bıyl M.Ótemisov atyndaǵy BQMÝ-dyń (burynǵy Oral pedagogıkalyq ınstıtýty) 85 jyldyǵy da atalyp ótilmek.
