Oralda tapanshamen júrgen er adam qolǵa tústi
QR Ulttyq ulanynyń baspasóz qyzmeti málim etkenindeı, oqıǵa 26 naýryz kúni saǵat 17.50 shamasynda boldy.
«Batys» óńirlik qolbasshylyǵyna qarasty 5517-áskerı bóliminiń quramynda top basshysy, serjant Elaman Amanǵulov, qatardaǵy jaýynger Aıbat Jeńis bar jasaǵy
Gagarın kóshesi boıynda kúdikti adamdy baıqap qalǵan. Tártip saqshylaryn kórgen er adam kúrtik qarǵa rıýkzakty laqtyrǵan. Sosyn boı tasalap ketpek bolǵan. Jedel is- áreketter nátıjesinde kúdikti ustaldy.
Oqıǵa ornyna jetken áskerı jasaqtar boıynsha kezekshi, leıtenant Nursultan Júsipov kınolog, serjant Rústem Ospanovpen birge «Argo» esimdi ıisshil ıttiń kómegimen sol aýmaqty qaraý jóninde sheshim qabyldaǵan. It kóp uzamaı-aq qara tústi rıýkzakty tapty. Kýálardyń qatysýymen qaraǵan kezde rıýkzaktyń ishinen belgi beretin tapansha jáne alty rezeńke oq-dári salynǵan qorap shyqty.
Er adamǵa qarýdyń nege kerek bolǵandyǵyn tergeý oryndary anyqtaıtyn bolady. 47 jastaǵy turǵyn odan ári anyqtaý úshin polıtsııa bólimine jetkizildi.
Qyraǵylyq kórsetkeni úshin atalǵan top bólim komandırimen yntalandyryldy.
Eske sala keteıik, budan buryn Oralda zańsyz dári-dármek satqan erli-zaıyptylardyń ustalǵanyn jazǵan bolatynbyz.