Oralda tanysynyń aqshasyn qaıtarmaǵan polıtsııa bóliminiń burynǵy basshysy sottaldy
ORAL. QazAqparat - Oral qalalyq ishki ister basqarmasyna qarasty Abaı polıtsııa bólimi jergilikti polıtsııa qyzmetiniń burynǵy basshysy Berik Tileýlıevke qatysty sot otyrysy ashyq túrde ótip, oǵan saqshylar qatysty.
Oral qalalyq ishki ister basqarmasynyń baspasóz qyzmetkeri Gúlaman Ismaǵulovanyń habarlaǵanyndaı, Oral qalalyq sotynyń sýdıasy Rýslan Jumaǵulov júrgizgen sot talqysynda belgili bolǵanyndaı, jábirlenýshi A.Rahmetova men aıyptalýshy B.Tileýlıev otbasylarymen aralasyp, dostyq qarym-qatynasta bolǵan. B.Tileýlıev atalǵan azamatshaǵa memlekettik baǵdarlama aıasynda barlyq jaǵdaıy bar páterge qol jetkizýge kómektesetinin, ol úshin 1,1 mln teńge aqsha kerektigin aıtady. A.Rahmetova Halyq bankiden nesıe alyp, 2014 jyldyń jeltoqsanynda qarjyny B.Tileýlıevke beredi. Alaıda ýáde etilgen páter máselesi sheshilmeıdi, aqsha da qaıtarylmaıdy. Aqyry shydamy taýsylǵan A.Rahmetova bıylǵy naýryzda quqyq qorǵaý organdaryna habarlasyp, aryz bergen. Degenmen sot úkim shyǵarǵan kezde B.Tileýlıevtiń aqshany óz erkimen qaıtaryp bergenin, istegen áreketterine ókinetinin, otbasynda kámeletke tolmaǵan balalarynyń bar ekendigin, jábirlenýshi taraptyń oǵan eshqandaı talaby joqtyǵyn eskerdi. Sóıtip B.Tileýlıev QR QK 177-baby 3-bóligi «b» tarmaǵyna sáıkes (1997 jylǵy redaktsııada, iri mólsherde jasalǵan alaıaqtyq) aıypty dep tanylyp, bes jylǵa bas bostandyǵynan aıyrý jazasy belgilengenimen, QR QK 63-baby qoldanylyp, oǵan 3 jylǵa synaq merzimimen bas bostandyǵynan aıyrý jazasy kesildi.
Sottalýshy sondaı-aq polıtsııa aǵa leıtenanty sheninen jáne memlekettik mekemelerde ómir boıyna qyzmet etý quqyǵynan aıyryldy.
