Oralda tamaqtan ýlanǵan áıel kóz jumdy
ORAL. QazAqparat - Oral qalasynda tamaqtan ýlanǵan áıeldiń qaıtys bolýyna baılanysty tergeý amaldary júrgizilýde, dep habarlaıdy «QazAqparat» tilshisi.
BQO ІІD baspasóz qyzmetinen túsken málimetke qaraǵanda, 25 tamyz kúni qaladaǵy úılerdiń birinde saǵat 10.00 shamasynda 1971 jylǵy áıeldiń múrdesi tabylǵan. Onyń 2001, 2002 jáne 2003 jylǵy balalary oblystyq juqpaly aýrýlar aýrýhanasyna jetkizilgen.
Atalǵan derek QR QK 304-baby 2-bólimine (abaısyzda adam ólimine soqtyrǵan sanıtarlyq erejeni nemese gıgıenalyq talapty buzý) sáıkes sotqa deıingi tergep-tekserýdiń biryńǵaı tizilimine tirkelip, qazirgi kezde tergeý amaldary júrgizilýde. Sot-medıtsınalyq saraptamanyń qorytyndysy kóp uzamaı belgili bolmaq.
Oral qalalyq tutynýshylar quqyǵyn qorǵaý basqarmasynyń basshysy Mádenıet Tanaýovtyń aıtýynsha, 22 tamyz kúni tańerteń marqumnyń úlken uly Nurbol, keshkisin Saıt, 23-inde qyzy Shaharbaný aýyrǵan. Olardyń barlyǵy 19 tamyz kúni úıde ázirlengen mantymen úsh kún boıy, saqtalý merzimin eskermeı, tamaqtanǵan. Oǵan qosa úsh kún boıy aýyrsa da, medıtsınalyq kómekke júginbegen. Jedel kómekti Shaharbanýdyń ótinishi boıynsha kórshisi shaqyrǵan.
28 tamyz kúni Nurbol men Saıtqa salmonellez, al 6 qyrkúıekte Shaharbanýǵa etıologııasy naqtylanbaǵan jiti ishek juqpasy dıagnozy qoıyldy.
Qazirgi tańda Saıt pen Shaharbaný saýyǵýyna baılanysty shyǵarylyp, al Nurbol áli oblystyq juqpaly aýrýlar aýrýhanasynda jatyr.
