Oralda taksıske shabýyl jasaǵandar ustaldy
ORAL. QazAqparat - Oral qalasynda taksıske qaraqshylyq shabýyl jasaǵandar ustaldy, dep habarlaıdy «QazAqparat» tilshisi.
Oral qalalyq ishki ister basqarmasy jergilikti polıtsııa qyzmetiniń aǵa ınspektory, polıtsııa maıory Dınara Ábdilqalyqovanyń aıtýynsha, 18 qańtar kúni saǵat 18.00 shamasynda eýropalyq pishindes eki adam Et kombınaty aýdanynan taksı shaqyrǵan. Tapsyrysty «Lada Kalına» avtokóliginiń júrgizýshisi qabyldaǵan. Sóılegen sózderi men is-áreketteri kúdiktileý bolsa da, júrgizýshi olardy «Batys Qazaqstan mashına jasaý kompanııasy» mańyndaǵy kórsetilgen mekenjaı boıynsha aparyp tastaýǵa sheshim qabyldaıdy.
Jolaýshylar atalmysh zaýyttyń artqy qaqpasyna qaraı, kóldeneń kózderden tasa jerge barýǵa ótinish jasaıdy. Avtokólik toqtaǵan kezde jolaýshylardyń biri belbeýmen júrgizýshini tunshyqtyra bastasa, ekinshisi tapanshaǵa uqsas zatpen basynan soǵady. Júrgizýshi qarsylasyp baǵyp, aldyńǵy áınekti aıaǵymen syndyrýǵa tyrysady. Qaskúnemder onyń uıaly telefony men aqshasyn tartyp alyp, oqıǵa ornynan sytylyp shyqqan.
Júrgizýshi olardyń sońynan aıqaılaı júgirgenimen, álgiler «tapanshasymen» qorqytyp, boı tasalaǵan.
Qaraqshylyq shabýyl «Qaýipsiz aýla» júıesi boıynsha ornatylǵan kameraǵa túsip qalǵan.
Jedel izdestirý sharalary barysynda kúdiktiler qylmystyń izi sýymaı, qolǵa tústi. Olar buryn birneshe ret sottalǵan, ury jáne qaraqshy retinde esepte turatyn Oral qalasynyń 1989 jylǵy Sh. jáne burynnan urlyǵymen belgili bolǵan 1993 jylǵy G. degen turǵyndary bolyp shyqty.
Urlanǵan zattar tárkilendi. Ustalǵandar ýaqytsha oqshaýlaý ızolıatoryna qamalyp, tergeý amaldary júrgizilýde.
