Oralda taksıske qaraqshylyq shabýyl jasaǵandar ustaldy
ORAL. QazAqparat - Oralda taksı júrgizýshisine qaraqshylyq shabýyl jasaǵandar ustaldy, dep habarlaıdy «QazAqparat» tilshisi.
Oral qalalyq ishki ister basqarmasynyń baspasóz qyzmetkeri Gúlaman Ismaǵulovanyń aıtýynsha, 10 jeltoqsan kúni tańǵy saǵat tórtte ońaı olja tabýdy kózdegen eki jas jigit jolaýshy tasyp, aqsha taýyp júrgen taksı júrgizýshisin tonamaqshy bolǵan. Olar qala ortalyǵyndaǵy Nekrasov pen Komsomol kósheleriniń qıylysynda bar jıǵanyńdy ber dep, taksıske tıisken. Ony soqqyǵa jyǵyp, kóp aqsha taba almaǵannan keıin onyń «Lada Prıora» avtokóligin alyp ketpekshi bolǵan. Aqyry 1991 jylǵy júrgizýshini bes jerden pyshaqtaǵan. Abyroı bolǵanda, taksı júrgizýshisi der kezinde aýrýhanaǵa jetkizilip, aman qaldy.
Jedel izdestirý sharalary barysynda qylmystyń izi sýymaı, 11 jeltoqsan kúni 1988 jáne 1992 jylǵy eki kúdikti qolǵa tústi. Olardyń bireýi Oral qalasynan, ekinshisi Qaztalov aýdanynan bolyp shyqty.
Oqıǵa ornynan tártip saqshylary aıaqkıim izderin taýyp, pyshaq, uıaly telefon, kıim-keshek, eki 200 teńge jáne basqa aıǵaq zattardy tárkiledi. Qaraqshylar aıdap ketken kólik Zachagan kentindegi Temirtaý kóshesi boıyndaǵy úılerdiń biriniń qasynan tabyldy.
Kúdiktiler barlyq is-áreketterin tolyqtaı moıyndady. Qazir qamaýda otyrǵan olarǵa qatysty qylmystyq is qozǵalyp, sotqa deıingi tergeý amaldary júrgizilýde.
